984/2024-2025

Aizawl, the 27th June, 2024: Vawiin chawhnu dar 2:00 khan RCS Office Conference Hall, Babutlangah Cooperative Society thawk thate hnena hlan thin National Cooperative Development Corporation (NCDC) Regional Awards for Cooperative Excellence and Merit -2023 chu sem chhuah a ni. Khuallian Cooperation Minister Pu PC Vanlalruata chuan he hunah hian Cooperative Society 3 te hnenah chawimawina a hlan a ni.

Khuallian Pu PC Vanlalruata chuan Cooperative Society tithate chawimawina hun buatsaih a ni leh lawmmante sem chhuah a ni chu lawmawm a tih thu sawiin, Cooperative Movement tihchak kawngah rah tha a chhuah ngei a beisei thu a sawi a. Chawimawina dawngte a lawmpui thu sawiin, midang tana entawntlak nih chhunzawm zel tum turin a fuih a. Eizawnna ngelnghet siam leh ram sum leh pai dinhmun siamthat kawnga pawimawh tak Cooperative society-te chu thahnemngai taka thawhhopuiah a sawm bawk.

Cooperation Minister chuan society-te tichangtlunga chawikang zel tura tanlak a tul thu sawiin, sawrkar policy 'Bana Kaih' ah Cooperative society-te ngaihpawimawh niin tangkai taka hman tum a ni a, hemi tur hian kan theihna leh thiamna kan tihpun a ngai a ni, a ti a. Sawrkar hmalaknaah society tel lova kal a harsat dawn thu sawiin, ram hmasawn nana hman tangkai theih tura kan intih chak deuh deuh erawh a tul hle dawn a ni, a ti a. PACS Computerization kalpui mek a nih thu tarlangin, tuna kalpui mek PACS 25 bakah a dangte pawh buaipui zel tum a nih thu a sawi a. Society tihhmasawnna tura tulte leh hamthatna awmte theihtawp chhuaha umzui turin Department hotute a chah a. Cooperative movement tichak turin sawrkar laipui pawh a tul ang zela dawra theihtawp chhuaha hmalak tum a nih thu a sawi bawk. 

He hun rawn hmanpuitu Pu Sang Kandu Mosobi, Chairman, AP MARKFED & Member of General Council, NCDC chuan NCDC Sub-Office Aizawl chu March 2024 atanga kalpui tan a nih thu leh North East State-ahte din vek tum a nih thu sawiin, hemi kaltlang hian District leh khaw hrang hrangahte chak zawka NCDC scheme-te hrilhhriat theih beisei a ni, a ti a. NCDC Aizawl Sub-Office chu theihtawp chhuah turin a chah nghal bawk. 

Thusawitu dang Cooperation Secretary Pu Vinay Kumar chuan Cooperative society-te'n Cooperative culture mai bakah sum lakluhna lam hawia hma an la chu fakawm a tih thu a sawi a. NCDC nena tang hova society thawk thate chawimawina buatsaih chuan phurna leh chona nasa zawk a pek ngei a beisei thu a sawi a. Society-te chu tun aia hmasawn tum turin a fuih nghal bawk. 

He hunah hian Pu Robert H. Touthang, Regional Director, NCDC Guwahati chuan inlawmna thu sawiin chawimawina dawng society-te hmalakna tlangpui a tarlang a. Pu R. Lalremsanga, Registar of Cooperative Societies-in lawmthu sawiin hun hman a khar a ni. 

NCDC Regional Awards for Cooperative Excellence and Merit hi kum hnih dana sem chhuah thin niin, North East State-a Cooperative Society hna thawk thate hnenah National Cooperative Development Corporation (NCDC) bultuma sem chhuah thin a ni a. Society hna thawh dan leh an dinhmun tehna hrang hrang point 6 te hmangin State Level Selection Committee, Cooperation Department Secretary kaihhruaina hnuaiah member 4 ten uluk takin an thlang thin a ni. He Award-in a tum ber chu ram hmasawnna kawnga Cooperative Society-te pawimawhna leh tangkaina hriatpuite, Cooperative-te'n a bulthut atanga ram hmasawnna kawnga tha an thawh theihna tura inelna thianghlim buatsaih leh NCDC in Cooperative Sector-a tha a thawh dan tarlante a ni.

Tun tuma NCDC Regional Awards for Cooperative Excellence and Merit-2023 hnuaiah hian society 3 te'n hetiang hian chawimawina an dawng a ni: 

1) Best PACS Category:

a) Excellence Award: Champhai Large Size Agriculture Multipurpose Cooperative Society Ltd.(Champhai LAMPS), Citation leh Rs. 25,000/-

b) Merit Award: Vaphai Primary Agriculture Credit Cooperative Society Ltd. (Vaphai PACS), Citation leh Rs 20,000/-

2) Best Societies in 2 prominent Sector hnuaia Consumer sector-ah Kawnpui Consumer Cooperative Society Ltd. te'n chawimawina dawngin Citation leh Rs. 25,000/- a kengtel a ni. 

He huna tarlan a nih dan chuan Champhai LAMPS hi kum 1981ah register niin, share holder member 277 leh nominal member 1130 an awm mek a. Hmalakna hrang hrang neiin, thawktu nghet 6 an nei mek a ni. Vaphai PACS hi kum 2015 ah register niin, share holder member 54 leh nominal member 640 an awm mek a. Hmalakna hrang hrang kalpuiin, thawktu nghet 2 an nei mek a ni. Kawnpui Consumer Cooperative Society Ltd. hi kum 1967 ah register niin, member 467 an awm mek a, hmalakna hrang hrang social service telin an kalpui a, thawktu nghet 6 an nei mek a ni.