No.224/2020-2021

Vawiin khan Cooperation Minister Pu C. Lalrinsanga hmalakna in Serchhip District chhunga Khawlailung Sugarcane Growers Association te tharchhuah Kurtai quintal 10 chu Local leh Village Level Task Force te kuta dah chhawn turin Cooperation Department hnuaia State Level Cooperative Society MIZOFED Ltd. chuan a thartute kut atangin a lei.

Khawlailung Kurtai thartute hi chhungkaw 120 vel niin tun COVID-19 Lockdown leh Curfew avanga an market a khaihlak chhoh dan te leh harsatna an neih ang te chu Minister Pu C. Lalrinsanga chuan a tir te atangin a enpui reng a. TUNAH hian an Kurtai tharchhuah chu a thawhkhatna atan MIZOFED kaltlangin Qtl 10 laksak phawt niin, Minister chuan a tul anga hma lak chhunzawm zel dan tur pawh ruahmanna siam a ni ang a ti.

Agriculture leh Irrigation & Water Resources changtu ni bawk Pu C Lalrinsanga chuan tuna COVID-19 hrileng avanga khawvel pumin harsatna kan tawh mek karah hian Zofaten inlungrualna leh thawhhona tha kan neih bik zia a lo lang a, khaw tin leh veng tina kan Task Force te, Kohhran leh Tlawmngai pawl te, Medical lama thawktute, kan Police lam te leh Sawrkar hotute leh Department hrang hranga chhum lo chat lova mipuite tana a lang lo lama thawktute inpekna ropui tak kan hmu hi chhuanawm a tih thu a sawi. Minister chuan, “ Zoram mipuiten India ram mai ni lo, khawvel pum huap pawha he hripui dona kawnga Sawrkar thupek zawm that kawngah leh thuawihna kawnga nun entawntlak tak kan lantir hi a ropuiin a malsawm em em a. Harsatna leh hreawm tuar chunga kan tanrual tlatna hi Pathian duhzawng a ni a. Kan awmhmun theuh atangin kan ram leh hnam tan Pathian i ko zel ang u” a ti.

Minister ruahmanna anga COVID-19 Lockdown chhung atana Agriculture Department-in Farmer Helpline an buatsaih pawh Loneituten tangkai taka hmangin an harsatna te phone hmangin Agriculture Directorate ah hunbi siam chhungin an sawi thin a. Agriculture officer ten loneitute harsatna rawn thlen te chu an bawhzui sak thin a ni.