Vawiin khan Chief Minister Pu Zoramthanga hovin Council of Minister chuan sawrkar department thenkhat atanga thu pawimawh lut te ngaihtuahin Chief Secretary's Conference Hall-ah an thukhawm.

Cabinet Meeting-ah hian agenda luh hma in Citizenship Amendment Bill pass tura rawtna kal mek chu pawm tha an tiloh thu leh an duhloh thu sawiin theihtawpa dodal zui zel an tum sawi a ni a. Council of Minister thukhawm chuan Mizorama Minimum Wage rate chu siamthat a tihpun chu pawm in, rate tharah hian Muster Roll a thawkte nitin hlawh chu Unskilled - Rs. 380, Semi Skilled - Rs. 420, Skilled-II - Rs. 520 leh Skilled-I - Rs. 640 tura duan a ni.

School kai hun sawn tura rel ni bawkin chawhma dar 9 a tan ni se tih a ni a. Chutihrual chuan private school thenkhatah chhan hrang hrang vanga dar 9 a tan theilo an awm chuan School Education Director hriattir ni se tia rel a ni bawk.

Social Welfare Department hnuaia PISGAH Reformatory Centre, Thingsulthliah tihchangtlunna leh Rilru buai (enkawlna an mamawh ang dawng tawh, chenna tur neilote) tana Rehabilitation Home siam tura rawtna lut chu Minister te chuan tha tiin pawm a ni bawk.

Heng bakah hian - Mizoram Police Service (Amendment) Rules, 2018; Draft Mizoram Animal Husbandry & Veterinary Services (Amendment) Rules, 2018; Mizoram Essential Services (Amendment) Bill, 2019; Mizoram Commission for Women (Amendment) Rules, 2019;  Mizoram Lotteries (Regulation) Rules, 2019 leh a dangte chu vawiin meeting-ah hian ngaihtuah ho a ni.