No.3908/2020-2021

Aizawl the 7th August, 2020: Vawiin khan Chief Minister Pu Zoramthanga hovin CM Cabinet Meeting Room-ah Council of Minister-te chuan sawrkar inrelbawlnaa thu pawimawh hrang hrang ngaihtuahin an thukhawm a. COVID-19 hrileng avanga mipui an him zawk nan Vairengte leh Kanhmun paltlang truck bungraw phur zingah nitin mamawh (essential commodities) phur chauh thu leh awm hma chu an paltlang phal rih nise tiin an rel.

Council of Ministers thukhawm chuan Kolasib district chhunga national highway a truck engemawzat tangkhang mek zinga driver leh handyman te Rapid Antigen Test hmanga an enfiah naah COVID-19 vei an awm tih hmuhchhuah a nih avangin mipui an him zawkna turin Mizorama lo lut tur bungraw phur lo lut reng reng chu khuahkhirh tha an ti a. Bungraw phur motor reng reng chu nitin mamawh (essential commodities) phur an nih loh chuan luh khap ni se tia rel a ni.

Essential Commodities phur lirthei khalhtu leh handyman te hi entry point ah screening uluk taka tih a ni ang a, Rapid Antigen Test a Negative chauh an luh tlang phal an ni ang. Chumi hnuah pawh kawnglakah khawchhunga an riah awih an ni lo ang a, lirthei in an bungraw dahna hmun an thlen hnuah pawh sawrkarin kaihhruaina dinglai a siam angin pawn a chhuak lovin, bungraw unload tu te nen pawh inhlat takin an awm ang a, bungraw unload zawh velah an let leh tur a ni. Kaihhruaina tha taka an zawm ngei theih nan kawng lakah Police patrolling pawh tam zawka kalpui tum a ni.

Bungraw phur lirthei te hi Vairengte leh Kanhmun chauh an paltlang thei dawn a. Border dang chu khar a ni dawn.

Kolasib district dinhmun thlithlai a district administration hmalakna te enpui turin naktuk hian Minister pathum - Pu Lalchhandama Ralte, Pu Lalruatkima leh Pu TJ Lalnuntluanga te an kal nghal dawn a ni.

Rapid antigen test hi Rapid Antibody test nen a inang lo a. Antigen Test a positive hi chu ICMR inkhaihhruaina angin true positive a pawm a ni.

Vawiin Council of Ministers thutkhawmah hian sawrkar department hrang hrang atanga thu pawimawh ngaihtuah tur lut te chu thlir ho a ni a. Public Works Department atanga The Mizoram Road Fund (Amendment) Bill, 2020 and The Mizoram Road Fund (Amendment) Rules, 2020 ngaihtuah tura lut te, Tourism department atanga The draft Mizoram Responsible Tourism Policy, 2020 leh The draft Mizoram (Registration of Tourist Trade) Rules, 2020 te, Taxation department atanga Mizoram Goods & Services Tax (Fourth Amendment) Bill, 2020 introduce tura rawtna lut te leh Sports and Youth Services Department atanga The Mizoram State Sports Council (Amendment) Bill, 2020 lut te chu pawm a ni a. Health and Family Welfare Department atanga The Mizoram (Prevention and Containment of spread of COVID-19) Bill, 2020 chu Assembly a chhawpchhuah turin an pawm bawk.