No.3326/2020-2020 

Vawiin khan Kolasib district-a thuneitute leh Counter Insurgency and Jungle Warfare School (CIJWS), Vairengte tangkawp hmalaknain CIJWS a thawkte leh he hmuna awm sipai, Mizoram pawn atanga lo lut khunghran mek te endikna hun neih a ni a. Kolasib Chief Medical Officers’ Office atangin Sample Collection Team hnih an thawk chhuak a, CIJWS a medical doctor Major Sonakshi leh a ho ten an lo tawiawm a ni.

CIJWS Quarantine Facility ah mi 17 leh Lailapur Quarantine Facility mi 79, an vaiin mi 96 Rapid Antigen Test kit hmanga endik an ni a. Medical team ten tul an tih angin RT-PCR sample pawh lak a ni bawk.

June ni 3, 2020 atangin CIJWS a sipai lo lutte hi khunghran tan an ni a, sipai ni ve lo, a hmuna thawk midangte pawh April thla atang khan ni 21 chhung khunghran an ni bawk. Sipai chawlh la a haw te hi India ram kharkhip (nationwide lockdown) avangin an chawlh (leave) pawhsei sak an ni a, June ni 3, 2020 atang sipai lo kir quarantine tur an awm tan a, an chawlh an hmang zo dawn tih hriat a nih a, CIJWS pan a an lo chhuah hma in inkhaihhruaina dan zawm tur hrang hrang phone kaltlanga pek thin an ni a. Quarantine Facility a awmte enkawltu tur a hranpa a ruat vek a ni a, an mamawh leh eitur petute hian uluk tak a PPE full set nena inthuamin an pe thin a ni. An zinga COVID-19 vei ni a rinhlelh, symptoms neite chu Military Hospital, Masimpur-ah dah thin an ni.

Vawiin a sample endik bakah hian sample dang 20 chu Silchar airport ah lo endik tawh a ni a, an zingah hian rinhlelh pakhat neih tawh niin Military Hospital, Mashimpur-ah enkawl a ni a. RT-PCR neih sak niin a Negative tih hriat tawh a ni.

CIJWS a thawk leh sipai, Silchar Airport leh rel kaltlanga lo lut te phurhna tur hian a bik a ruahman lirthei dah a ni a, motor, rel leh thlawhtheihna hmanga Sipai lo lut te hi Lailapur Quarantine Facility ah ni 21 enthlak thin niin CIJWS Quarantine Facility ah hian Officer leh sipai ni lo, hnathawk a chhawrte khunghran an ni thung a ni. CIJWS Quarantine Facility-ah hian mi 80 awm theina hmun siam a ni a, Lailapur ah hian mi 120 awm theihna siam a ni bawk a ni.
Vawiin atangin Vairengte paltlang a bungraw phur lirthei khalhtute sample lak pawh kalpui tan a ni a, hemi atan hian Sample Collection team 1, Kolasib CMO office atangin ruahman a ni a, vawiin tlai dar 4:00 thleng khan Vairengte screening point ah hian Tank Lorry driver 60 Rapid Antigen Test kit hmanga endik tawh niin an vai hian an negative vek a ni.

ICMR thurawn leh Zoram Medical College (ZMC) Standard Operating Procedure (SOP) angin Rapid Antigen Test kit hmanga positive hmuhchhuahte hi True Positive anga ngaih tur an ni a, ZMC laboratory-a RT-PCR khawla endik nawn kher a tul tawh lo a ni.