No.4888/2020-2021

Kolasib 9th September, 2020: Vawiin chawhma khan Kolasib District Hospital a TrueNAT Laboratory hawnna hun Pu K Lalrinliana, Minister of State for Foods, Civil Supplies & Consumer Affairs Department chuan a hmanpui a, Dr H Lalthlangliana, Deputy Commissioner-in hun kaihruaiin District Medical Superintendent, Medical Doctor leh Hospital-a thawktu dangten an telpui a ni.

Supply Minister Pu K Lalrinliana chuan Kolasib District Hospital-a TrueNAT Laboratory a hawnnaah hian, Mizoram district tin ah Sawrkarin TrueNAT Laboratory dah a nih vek theih nan Chief Minister leh Health Minister-ten ngaihtuahna an seng nasain hma pawh lak a nih mek thu a sawi a, Kolasib district a atak a hman theih tur a TrueNAT Laboratory peihfel a ni chu Kolasib district mipuite leh Mizoram mipuite tan Covid-19 dona kawng a hmanraw tangkai tak a nih tur thu a sawi. Kolasiba TrueNAT Quattro mini PCR ah hian a rualin sample pali (4) a en theih a, sample entheih tur a puahchahna khawl pahnih (2) awm mekin tun dinhmun ah chuan ni khatah sample hi 20-30 vel en hman tur a beisei a ni a, Minister chuan,” Sample endik tur a sawngbawlna khawl hi neih belh tur a hmalak a ni a,” a ti.

Minister chuan TrueNAT Quattro Mini PCR hmang hian natna chi hrang hrang 16 endik a nih theih dawn thu sawiin Covid-19 sample endik piah lamah district mipuiten tangkai taka an la chhawrh theih dawn thu a sawi a. Tun a Laboratory bunna hmun chu hnathawhna tha zawk leh him zawka kalpui a nih theih nan hmuhma zau zawkah sawn tura hma lak a nih tur thu a sawi bawk a ni.

“Ramri thui tak awmna, ram pawn atanga nitin mamawh phur lirthei luh rengna district nichung leh kan ram thenawm hnai ah hri kai an pun nasat em em lai a he hri laka tha tak a invenna kan la kalpui thei hi District a thuneitute, dan leh thupek kengkawhtute, tlawngai pawl leh khawtlang hruaitute inpekna leh thawhhona that vang a ni,” a ti a, India ram pum ang pawhin Covid-19 hri venna kawngah State titha ber pawl kan nih mek thu a sawi bawk a ni.

Minister chuan mithiamte chhut danin December 2020 hian Mizoramah Covid-19 hri kai hi mi 5000 tling tur a ngaih a nih thu sawiin an chhut ang zat kan tlin lohna turin mitin fimkhur tak a hun hmang turin leh Sawrkarin inkaihhruaina a siamte zawm hram hram turin a chah a,”Covid-19 avanga sum tam tak luang ral tur te, chhungkua a harsatna tam tak thleng thei te, hri doa thawktu hah tak takte hah belh chhah theihna thleng thei te hi kan fimkhur tlan chuan kan pumpelhin kan inchhawk tlang thei a ni” a ti.

Dr Lalrawngbawla Colney, Medical Officer hnen atangin Technical report ngaihthlak a ni a, Dr Lalhlimpuia, Chief Medical Officer in lawmthu sawina hun a hmang bawk a ni.

TrueNAT Laboratory, Kolasib district ah hian thawktu, Medical Officer (MBBS) pakhat (1), Laboratory Technician pahnih (2), Data Entry Operator pakhat (1) leh Group-D hnathawk pakhat (1) an awm a ni.