(No.3128/2019-2020)

Vawiin chawhnu khan DC Conference Hall, Champhaiah tunlai hrileng ngaihven hlawh tak Novel Coronavirus Disease (Covid-19) laka invenlawk dan tur chungchangah inrawnkhawmna Bawrhsap Pu SL Naveen, IAS hova neih a ni.

Pu SL Naveen chuan sawmna ngaipawimawha hun hlu tak senga kalkhawmte chungah lawmthu sawiin, Covid-19 lengdarh tur laka inven kawngah kan zavaia tan tlana thawhho angai a ni, a ti a. Tun dinhmunah Champhai District-ah he natna vei rinhlelh an la awm lo a, pawn lam atanga rawn lut thei laka kan invenhim angai a ni, a ti a. Kum lama upate chu natna kai thei leh tuar thei langsarte an ni a, insawiselna an nei anih chuan ngaihsak zual an nih tur thu a sawi a. Mahni chenna hmuna inkhung hran pawimawhna pawh sawiin, natna finfiahna khawl kan la neih mai loh avangin a lo berah ni 14 tal inkhung hran chuan natna punlun zel tur a veng thei dawn a ni, a ti a. Mizoram chu khawtlang tangrual tak awmna anih thu sawiin, kan zavaia tanrual chuan he natna pawh hi kan do hneh thei ngei ang, a ti a. Chanchinbumite pawh mipuite zirtir kawnga tan la sauh sauh tur leh finchhuah ngaihna angahte theihtawp chhuah turin a sawm a. District chhunga Damdawiin hrang hrangte pawh a tul anga rinhlelh awmte endika hmunhmate puahchah turin a ngen nghal bawk a ni.

Pu Mark Lalthanliana, Addl. DC Champhai chuan Kohhran rawngbawltute chu sawrkarin mipuite hnena puanzar tur a siam dawn thu hrilhin, Biak In chu mipui tam zawk lawiluhna anih angin zirtirna puandarh kawngah thahnem ngai taka sawrkar tawiawm chhunzawm zel turin a ngen a. India ram hmun dangahte Zirna In leh hnathawhna hmunte khar anih mek avangin pawn lam atanga rawn haw tum an tam dawn thu sawiin, uluk taka enfiahna kalpui a tul thu a sawi a. Myanmar kaltlanga Champhai rawn lut turte pawh YMA nena in rawn tlanga, hriatchian leh finfiahna lehkha rintlak tak neite chauh luh phal saka, Medical Screening tih sak zel an nih thu a sawi bawk.

Thukhawm chuan chipchiar takin hmalak dan turte an sawiho a. Ram dang leh State dang atanga lo lutte chu uluk taka Medical Screening neihpui hnuah In lama inkhung hrang zel tura hriattira vil zui nise, Champhai Helipad-ah Screening Point hawn nise a ti a. He hunah hian Kohhran rawngbawltute pawhin sawrkar hmalakna leh thuchhuahte tha taka zawma an tawiawm tlat dawn thu sawiin, inrawnkhawmna te neiha hmalak zel dan turte siam nise an ti a. Meeting chuan Champhai Khankawn Police Check Gate-ah mihring phur Lirthei Sumo leh Taxi-te tan Medical Screening kalpui nise tiin, passenger-te hming, awmna hmun leh biakpawhna number-te thehluh thin nise, tiin a rel bawk a ni.

Meeting-ah hian District official-te, Champhai khawpui chhunga kohhran hrang hrang rawngbawltute, Chanchinbumite, NGO hotute, VC aiawh leh Lirthei neitu pawl hotute an tel tha hle a ni. Vawiin atang hian Champhai DC Office thawktute, dawr turte leh meeting tel turte chuan Medical Screening an paltlang hmasak angai tawh dawn a ni.