No.955/2020-2021 

Vawiin chhun  khan Pu LH Shanliana, IGP (Law & Order) hovin Police Officer-ten Aizawl SP Conference Hall ah COVID-19 darhzel tur venna kawnga Police te hnathawh dan thlirhona hun an hmang a. IGP (Law & Order) hi  Deputy Inspector General of Police pali, Senior SP pahnih leh Commandant pahnih ten an tawiawm a ni.

Covid-19 donaah Mizoram Police ten theihtawp chhuahin chhun leh zanah hna an thawk a. Ramri khar na leh hmun hrang hrang a Police duty dan chu hetiang hi a ni.

Mizoram khawthlang lam ramri venna kawnga thawk mekte thuamchak (re-inforce) turin tunkar chhung hian Police tirh luh belh tum a ni a. COVID-19 kaihhnawih duty bakah Police hna kal lai mek dang - Police Stations, Static Guards, VIP security, Battalion Out Post te leh Police office hrang hrangte nitin chawl lovin thahnem ngai takin hna an thawk reng bawk a ni.

Vanduaithlak takin Covid-19 dona a Police duty lai a thi mi pali an awm tawh a. Chungte chu :-

1. C/323 Lalduhthlana Chhangte, (2nd Bn MAP) Thih ni 7th April, 2020

2. Hav F.Lalthansanga (2nd Bn MAP) Thih ni 17th April,

3. Const. Laltanpuia (Security Unit) Thih ni 30th April, 2020

4. Const. Eddie Saizamliana (5th IR Bn) Thih ni 9th May, 2020

Vawiin a Security review meeting neihah hian mitthi te sunna hun an hmang a ni.

Mizoram Police chuan Covid-19 dona atan leh dan leh thupek kenkawh kawngah theihtawp a chhuah mek reng a. The Mizoram (Containment and Prevention of Covid-19) Ordinance 2020 hman a nih atangin dan bawhchhia mi 1715 hrem an ni tawh a, chung mite pawisa chawi tir zat chu Rs. 4,05,400 a tling a ni.

Security review meeting ah hian Pu Lalbiakthanga Khiangte, DIG(Northern Range) chuan Curfew leh Lockdown inkaihruaina dan hman mek a sawifiah a. Pu Neihchungnunga,DIG, CID chuan COVID-19 hri laka mipui him nan tha thlah lova hna thawh a tul zia a sawi a, Police te chu fimkhur lehzual turin a chah a ni.

Meeting-ah hian Aizawl khawpui chhunga duty enpuitu Addl SP pathum, SDPO te, Zonal Officer, Police Control Room duty leh Traffic Unit atangin DySP  rank officer sawmpakhat te leh Aizawl khawpui chhung Police Station OC te an tel a ni.