No.6639/2020-2021
Aizawl, 23rd November, 2020: Vawiin khan Directorate of Hospital & Medical Education Conference Hall, MINECO-ah Medical Operational Team Chairman, Health & Family Welfare Board Vice-chairman ni bawk Dr. ZR Thiamsanga, MLA hovin Covid-19 dona kawnga pawimawh tak mai, Covid-19 sample test tam lehzual neih a nih theih dan tur sawi ho a ni a. He hunah hian Principal Director, H & FW, Health Services leh Hospital & Medical Education hotute, NHM leh IMA bakah Medical Operational Team te an tel a ni.
Meetingah hian Aizawl khawpui chhunga hmun remchang, awlsam taka sample test theihna tur Kiosk buatsaih dan tur sawi ho a ni a, a duh apiang tan Covid-19 test theihna hmun tur ruahman mek a nih thu leh hei hi chak taka kalpui mek a nih thu tarlan a ni a. Test man pawh a tlawm thei ang bera tihdan tur rawtna chhawpchhuah niin hei hi Sawrkar pawmpuina la tur a thlen a ni ang.
Kan hmalawka hunpui Krismas leh Kumthar hmuah dan chungchang te sawi ho a ni a, mipuite himna a pawimawh ber thu uar taka sawi ho niin, hemi atana rawtna hrang hrang an buatsaihte chu sorkarah thlen nise an ti.
