No.3450/2019-2020

Sawrkar Department hrang hrang ten COVID-19 dona kawngah huamzau taka hma an lak thei nan leh COVID-19 hripui leng in harsatna hrang hrang a siam te kil tin atanga sutkian a ni thei nan vawiin khan Chief Secretary Pu Lalnunmawia Chuaungo, State Executive Committee Chairperson ni bawk chuan Task Group 5 din hriattirna a chhuah a. He hriattirna hi Disaster Management Act, 2005 hnuaia bung 22(2)(g) leh (h) in State Executive Committee Chairperson thuneihna a pek angin chhuah a ni a. Task Group tin Chairman, Member Secretary leh Member-te hi he hriattirna in a ruat nghal a ni.

Task Group  on Medicine & Medical Equipments ah hian Secretary, Health & Family Welfare Pu H. Lalengmawia chu Chairman niin Director, Health Services Dr. Lalchungnunga chu Member Secretary a ni a; Member-te chu – Dr. F. Lianhlira, Principal Director, H&FW; Pu Lalhmingmawia, Addl. Secretary, Finance(EC); Dr. T.  Lalhmangaihi, Director, Hospital & Medical Education leh Pu John L.T. Sanga, Director, DM&R te an ni.

Task Group  on Migrant Workers and Stranded Travellers ah hian Addl. Secretary. Home Department Pu Laldawngliana chu Chairman niin Deputy Secretary, GAD Pi Margaret Lalrinawmi Fanai chu Member Secretary a ni a; Member-te chu – Pu Alexander V. Chawngthu Joint Secretary, FCS&CA Department leh Director, LESDE te an ni.

Task Group  on Transport ah hian Commissioner & Secretary Transport Department Pu K.T. Beichho, chu Chairman niin Pu Lalrammawia, Director, Transport Department chu Member Secretary a ni a; Member atan Pi HM Hualsangi, Secretary, SAD ruat a ni.

Task Group  on Insurance ah hian Addl. Secretary, Finance Pu Ramchuana chu Chairman niin Deputy Secretary, H&FW Department Dr. Lalngura Tlau chu Member Secretary a ni a; Member-te chu –Pu C. Lalmuankima Deputy Director (Admn.), DHS; Pi Lalrikhumi Sailo, Deputy Director (Admn.), DHME leh Dr. Vanlalrengpuia, SPM, National Health Mission te an ni.

Task Group on Animal Husbandry & Veterinary Services and Fisheries ah hian Secretary, Ah & Vety. Department Pu C. Lalpeksanga chu Chairman niin Director, AH &Vety. Department Dr. Hmarkunga chu Member Secretary a ni a; Member-te chu – Finance Department aiawh Joint Secretary aia hniam lo leh Pu F. Vanlallawma, Director, Fisheries Department.