No.230/2020-2021

Health Minister Dr R.Lalthangliana hovin vawiin khan Mizoram Legislative Assembly Annexe Conference Hall-ah Health Department leh a kaihhnawih pawl hrang hrang ten COVID-19 dona atana hma an lak dan te, hmalak an tum dan leh hmachhawp an neihte an thlir ho.

Dr R.Lalthangliana chuan he meeting hi kaihruaiin Health kaihhnawiha thawktu zawng zawng, sawrkar hnuaia thawk te leh private-a thawkte tiamin, fakawm a tih thu a sawi a. An thawhna peng tinah hneh takin an thawk theuh nia a hmuh thu leh tun dinhmunah ral hmatawnga beitute an nih angin an thawhrimzia leh hahzia pawh a hriatpui thu a sawi a. Mizoram chhung chauh ni lo India ram hmun dang atangte pawhin COVID-19 donaa Mizoram hmalakna chuan fak a hlawh tih a sawi.

Meeting-ah hian ZMC ICU-a COVID 19 damlo enkawl mek dinhmun Medical Superintendent Dr.H.C Laldina hnen atanga ngaihtlak niin April ni 4 atanga a khawsik a ziaawm tan thu te, a taksaa vital organs (chuap, lung, kal leh a dangte) hnathawh pawh zawi zawia a that chhoh thu te, ventilator phawi theih ni chiah rih lo mahse Oxygen pawh hniam zawka kal tir a nih tawh thu a sawi a. Damlo COVID-19 vei mek test sample hi en nawn leh turin April ni 5 khan thawnthlak a nih thu leh, result nghah mek a nih thu a sawi a ni.

ZMC-ah hian February thla atangin Task Force on COVID-19 din a ni tawh a. He committee-ah hian mithiamte member-ah dah niin doctor, nurse, Group D leh a kaihhnawih dang zawng zawngte a khat tawka training pek reng an ni. COVID-19 damlo enkawl mektu doctor leh nurse te hi a inchhawka an luh a ngaih avangin tun thleng hian mahni inah an la haw thei lo a, an riahna leh ei leh in turte damdawi inah hian buatsaih sak an ni.

ZMC-a Asst Professor, Microbiology Department Dr Gracy Laldinmawii, Core Committee on Setting up of COVID-19 Testing Laboratory-a Member Secretary ni lai chuan ZMC a COVID-19 test theihna laboratory din a nih dan tlangpui a sawi a. March ni 23 a he committee din a nih hnuah April ni 7, World Health Day ni takah a vawikhatna atan sample 11 test a nih thu a sawi.

Aizawl Civil Hospital Medical Superintendent Dr Lalhmuchhuaka chuan Civil Hospital inbuatsaih dan sawiin damdawi in leh a vel bleach a kah te, kutsilna siam belh leh hand sanitizer chhawp te, damlo kan khap leh damlo awmpuitu pakhat chauh awm an phalsak dan leh pawn lam atanga ei leh in pe lova hospital chhungah damlo awmpuitute tan pawh hospital chaw buatsaihsak an nih thu a sawi. OPD khar ni lo mahse tul zual lo chu kal lo turin mipui an ngen a, doctor te englai pawha phone kaltlanga rawn theih turin an inring thung. ZMC a damlote Aizawl Civil Hospital-ah sawn phei an ni a, thawhhona tha tak neiin an inbe pawp reng a ni.

Pu R Thanglura, AMC Councillor leh Mizoram Drug Dealer Association President ni bawk chuan lock down leh curfew kalpui mek a nih avanga damlo dang tam tak tana damdawi pawimawh chah thlen kawnga harsatna an tawh dan a sawi a. Health Minister tanpuina in Guwahati atangin damdawite hi phur thlen tan a nih thu leh Diabetes damdawi leh dialysis atana hmanraw mamawh te pawh sawrkarin ruahmanna siamin Aizawlah phur thlen a ni, a ti a. District danga heng damdawi mamawhte phurh thlen a nih theih nan COVID-19 Task Group on Transport te nen tanghoa hmalak ni se an ti a ni. Dr Lalsawma, Joint Director, Food and Drugs bakah Mizoram Pharmacist Association President pawhin damloten damdawi an hmuh theihna tura ruahmanna an siamte an sawi lang bawk a ni.

Vawiin meeting ah hian COVID-19 Medical Operational Team Chairman MLA ni bawk Dr. Thiamsanga, leh Prof. F.Lalnunmawia, MLA te bakah Mizoram Chief Secretary Pu Lalnunmawia Chuaungo, Health Secretary Pu Lalengmawia, State Spokesperson on COVID-19 Dr. Pachuau Lalmalsawma ten thu tawi an sawi a. Indian Medical Association Mizoram State Branch aiawh te, Non-Governmental Hospital Association of Mizoram (NGHAM) aiawh te, Mizoram Government Doctors Association aiawh te, Directorate of Health and Medical Education aiawhte leh mi pawimawh dangte pawhin an hmalak dan report an pek bakah rawtna an neihte an sawi bawk.