No.2290/2021-2022
Aizawl, 21st September, 2021: Dr Pachuau Lalmalsawma, SNO, Official Spokesperson on COVID-19 chuan tun hnaia RT-PCR positive sample 350 Whole Genome Sequencing tura an thawn zinga COVID-19 hrik chhuak thar 316 (90.30 %) hmuh leh a nih thu vawiin khan a sawi.

Dr Pachuau Lalmalsawma chuan National Institute of Biomedical Genomics (NIBMG), Kalyani, West Bengal-ah August thla khan heng sample 350 te hi thawn a nih thu a sawi a, hrik thar hmuhchhuah zingah hian Mizoramah a awm tih la finfiah loh Delta Plus variant 3 a tel thu sawiin, heng variant te hi Champhai district-a mi 2 leh Kolasib district-a mi 1 an ni a, Delta Plus variant hi tunlaia kan hriat lar hri inkaichhawn awlsam tak Delta variant aiin za ah 60 (60%) in inkaichhawn a awlsam lehzual tih a sawi.

Sample thawn zinga 70 ah Delta variant chhungkaw zinga mi, Delta Lineages an tih mai, mithiam ten an zirchian mek, a hming an la phuah loh hmuh tel a ni a, Delta variant pangngai hi sample 213 ah hmuh niin, heng sample te hi Aizawl, Lunglei, Kolasib, Champhai leh Serchhip district atanga sample lak zinga mi an ni a. Mizoram atanga RT-PCR sample endik tura phai lama thawn tawhte atangin COVID-19 hrik thar 510 hmuh a nih tawh thu a sawi bawk a ni.

Dr. Pachuau Lalmalsawma chuan mipuite fimkhur tura chahin, hri kai leh kai loh test ngai lo tura mahni hmun theuhah Covid Appropriate Behaviour uluk taka kan zawm hi a pawimawh lehzual ta hle a ni, a ti.