No.2150/2021-2022

Aizawl, the 7th September, 2021: Nimin chawhnu dar 3:00 khan Khawzawl District Disaster Management Authority chu an Chairman Pu C.C. Lalchhuangkima, Deputy Commissioner hovin DC Office Conference Hall-ah an thukhawm a, Khawzawla Covid-19 Mass Testing kalpui mek dan thlirhoin, Covid-19 vanga Restricted Area-a puan khua/venga chhungkaw harsa zualte tanpui dan tur an ngaihtuah.

Khawzawl District khaw pathum- Khawzawl, Chawngtlai leh Biate te chu hmun khuahkhirh bik, Restricted Area-ah puan a ni a. Heng khuaa Village Level Task Force-te report danin inkhuahkhirhna khauh zawk kalpui vanga hnathawk thei lo, chhuanchham leh chhuanchham dinhmuna ding mai thei hi Khawzawlah chhungkaw 279, Biate-ah chhungkaw 99 leh Chawngtlaiah chhungkaw 8, an vaiin chhungkaw 386 an awm mek tih meeting-ah hian tarlan a ni.

Nimina DDMA thukhawm chuan heng chhungkaw harsa zualte tan hian Chief Minister’s Relief Fund atangin chhawmdawlna sem thuai nise tiin a rel a, a tul anga thawhhopui tur leh hma lakpui turin Khawzawl Officers Club sawm nise tih a ni bawk.

Khawzawl District Bawrhsap hova DDMA thukhawm chuan Khawzawla Covid-19 Mass Testing kalpui mek an thlirho bawk a. Mass testing hi District chhung khaw dangah pawh a tul ang zela kalpui tura ruahmanna siam mek zel a ni a. Deputy Chief Minister Pu Tawnluia, bialtu MLA ni bawk hmalakna zarah Mass testing tana pawimawh tak Test Kit pawh Khawzawl District tan hian 7,000 (sangsarih) lai a remchang thei dawn tih meeting-ah hian tarlan a ni bawk.

Nimina DDMA meeting-ah hian Pu C.C. Lalchhuangkima chuan Police Department hnenah Chief Minister’s Relief Fund atanga lei Covid-19 dona hmanrua chi hrang hrang- facemask, gloves, hand sanitizer, tuilumna, LED leh hmanraw dangte a hlan a, heng bungruate hi Pu Lalringliana, Additional Superintendent of Police, Khawzawl District chuan SP aiawhin a dawng a ni.

Meeting-ah hian DDMA, Khawzawl District member-te bakah DC office-a Officer-te, District Education Officer, Khawzawl Town VLTF aiawhte leh Khawzawl Sub-Headquarters YMA President-te an tel a ni.

September ni 2, 2021 atanga District Hqrs. Khawzawla Mass testing kalpui chu vawiin September ni 7, 2021 khan zawh fel niin, sample 5095 test atangin Covid-19 positive 11 hmuhchhuah a ni a, positivity rate chu 0.22% a ni.

Khawzawl District Headquarters Mass Testing Report kimchang chu hetiang hi a ni:
1. Vengthar: Sample test zat - 1570, Positive zat - 6
2. Dinthar: Sample test zat - 373, Positive zat - NIL
3. Zuchhip: Sample test zat - 366, Positive zat - NIL
4. Arro veng: Sample test zat - 164, Positive zat - NIL
5. Zaingen: Sample test zat - 491, Positive zat - 2
6. Hermon: Sample test zat - 605, Positive zat - NIL
7. Electric: Sample test zat - 408, Positive zat - NIL
8. Kawnzar: Sample test zat - 265, Positive zat - NIL
9. Lungvar: Sample test zat - 343, Positive zat - 2
10. Darngawn: Sample test zat - 510, Positive zat -1

Total:
1. Sample test zat - 5095
2. Positive zat - 11
3. Positivity rate: 0.22%