No.4522/2020-2021

India Danpui (Constitution of India) Article 174-na chuan Assembly Session thutkhawm ni hnuhnung ber leh thutkhawm neih leh ni hmasa ber inkarah thla 6 a tla tur a ni lo, tiin a sawi a. Eight Mizoram Legislative Assembly thutkhawm vawi 6-na pawh Danpuiin a phut angin hripui leng karah September 1, 2020 atanga September 3, 2020 thleng neih turin Mizoram Governor chuan a ko ta a ni. Hemi chungchangah hian vawiin khan Mizoram Legislative Assembly Commissioner & Secretary Pu H.Lalrinawma chuan Assembly thutkhawm muanawm leh hrisel neih a nih theih nana an inbuatsaih dan a sawifiah.

Hripui leng vangin tum danga tih ngailoh inbuatsaihna chipchiar taka duan niin hri laka invenna tur ruahmanna kimchang taka siam a ni a. MLA te leh session chhunga Assembly Building-a lut turte zawm tur standard operating procedure siam niin MLA zawng zawng leh official te hnenah semchhuah a ni. Building luh dawnah sanitizer-a kut silfai vek tura ni a, a chhunga lut te thermal scanning tih vek a nih hnuah thermal scanning paltlang te hming, contact number leh address chhinchhiah zel a ni ang.

Heng condition neite hi Session Hall luh phalsak an ni lo ang:-

1) 99F aia sang khawsik nei, tunhnaia khuh, thaw hah leh awm na nei.
2) Mi, tunhnaia quarantine mek nena contact nei.
3) Mi, containment emaw lockdown area atanga lo kal.
4) Mi, COVID-19 positive chenpui emaw tunhnaia positive nena contact nei.
5) COVID-19 lanchhuah dan (symptoms) hrang hrang nei.

MLA te leh midang tu pawh Assembly compound chhung leh Session Hall chhungahte social distancing dan zawm tur leh face mask englai pawha vuah reng tura beisei leh hriattir an ni a. Social distancing dan zawm a nih theih nan Chief Minister leh Speaker te duhdan leh thurawn angin Session Hall-ah dawhkan leh thutna dah belhin member-te dawhkan intawm lova, a mala an thut theihna turin siamrem a ni.

Deputy Medical Superintendent, Civil Hospital Aizawl chu nodal officer-ah ruat niin ani hovin doctor leh medical staff dang engemawzat session chhunga duty turin ruat an ni. Hemi bakah hian Disaster Management & Rehabilitation Department Director chu Disaster Management Act, 2005 leh SOP hrang hrangte tha taka zawm a nih theih nana enpui turin ruat a ni bawk.

Assembly thutkhawm vawi rukna atan hian starred question 239 a lut a, unstarred question 58 a lut. Assembly Session kalphung pangngai angin starred question hi ni khatah 20 zel a lut ang a. Zawhna lutkhawm atangin nitin zawhna 20-te hi ballot hmanga pawh thin a ni ang. Member pakhat zawhna a tam berah ni khatah 5 aia tam lo a lut ang. Session chhunga chhan hman loh starred question te hi unstarred anga letin Member zawng zawng hnenah a chhanna pek an ni ang a. Ni khata zawhna 20 lut zingah question hour darkar khat chhunga chhan hman loh a awm chuan session tawp niah Member zawng zawng hnenah a chhanna pek an ni ang.

Assembly Session vawi 6-naah hian bill 8 a lut a. Chungte chu:-

1.The Mizoram Salaries, Allowances and Pension of Members of the Legislative Assembly (Eight Amendment) Bill, 2020 - Parliamentary Affairs Department.
2.The Mizoram Shops and Establishment Regulation of Employment and Conditions of Service (Amendment) Bill, 2020 – LE&SDE Deptt.
3.The Mizoram (Containment and Prevention of the Spread of Covid-19) Bill, 2020 – Health & Family Welfare Department.
4. The Court Fees (Mizoram Amendment) Bill, 2020 – Finance Department.
5.The Mizoram Fiscal Responsibility and Budget Management (Amendment) Bill, 2020 – Finance Department.
6. The Mizoram Goods and Services Tax (Fourth Amendment) Bill, 2020- Taxation Department.
7. The Mizoram States Sports Council (Amendment) Bill, 2020 - Sports & Youth Services Department.
8. The Mizoram Goods and Services Tax (Amendment) Bill, 2020- Taxation Department.