No.1743/2020-2021
Health & Family Welfare Minister Dr. R. Lalthangliana chuan vawiin khan COVID-19 in Mizoram a chenchilh tak avanga tualchhunga inkaidarh (community spread) a hlauhawm thu a pisaah a sawi a, tumah indem leh inmawhpuh hun a ni lova, tun hun hi kan fimkhur zual a pawimawh hun lai ber a nih avangin mitinten kan himna tur a ni tih hriain sawrkarin ruahmanna a siamte tha takin i zawm hram hram ang u, a ti a. Hrehawm deuh mahse hun reilote chhung thuawih taka kan tan tlan chuan he natna hi kan hneh ngei ang, a ti bawk.
Health Minister chuan thla hnih leh a chanve vel zet Mizoramin COVID-19 vei thar kan neih loh hnuah June ni 1, 2020 khan a rualin mi 12 zet hmuhchhuah a ni a, hemi hnu hian nitin kan hmu chhuak thar ta mai a, tun thla chhung ringawtah pawh mi 23 lai in an vei ta a ni, a ti a. Heng COVID-19 natna vei hmuhchhuah tharte hi a naupang ber kum 19 niin a upa ber kum 45 a ni a, State dang atanga tunhnaia lo haw, quarantine lai vek an ni tiin tun dinhmunah ngaihtuahawm an awm rihlo, a ti.
Health Minister chuan rei tak vei thar kan hmuh loh vangin kan inthlahdah tan niin a lang a, mitin kan fimkhur thar lehzual a tul a, hmai tuamna (mask) vuah leh social distancing zawm a, kut silfai bakah taksa leh chenna vel te thianghlim taka enkawl turin mi zawng zawng a chah a ni. Sawrkar pawhin hengte hi kan zawm theih nan dan a siam a, thuawihlo chu hmun leh hmunah pawisa chawi tir bakah lung in tan tir hial theih a ni, a ti bawk.
Government/Community Quarantine Centre a awmte pawh an chhuah hnuah kar khat tal chu pawn chhuaklo tur leh inchhungah pawh chenpuite nen inhnaihpawlh lutuk lova hun hmang tura chahin social distancing leh mask vuahte la zawm turin a chah a, an chhungte pawhin lo ngaipawimawh turin a chah bawk.
Health Minister chuan nimina IBSD, Imphal-in RT-PCR Quant Studio TM-5 Mizoram sawrkar a hman hawh tir helicopter hmanga han lak chu ZMC a hman tura buaipui char char a nih thu leh khawl thar pahnih NHM leh mimal donation kaltlanga order a nih thu sawiin hun reiloteah Mizoram a rawn thlen a beisei thu a sawi a. SDRF atangin PCR test tam zawk tih theihna atana hmanraw pawimawh “Automated RNA extractor” lei tura hmalak mek a nih thu sawiin nimin khan Forensic Science Laboratory ta pawh ZMC ah dah phei a ni tawh a ni a ti a, hman theiha peihfel a nih hnuah chuan ni khatah swab sample 1000 chuang test ziah theih a ni tawh dawn, a ti a ni.
Hmanni lawka swab sample test theihna khawl PCR tlukpui ‘Trunat Machine’ Lunglei Civil Hospital-a dah pawh ICMR in a pawmpui tawh thu sawiin reiloteah test a tih tan theih tawh dawn a ti. Lengpui Airport a thlawhtheihna hmanga Mizoram rawn lutte dawngsawng tura inbuatsaihna chuan fak a hlawh tih sawiin, India ram Airport zinga a titha ber pawl an nih thu a sawi a ni.
COVID-19 natna veite zinga 80% chu natna serious lo ‘mild case’ an nih thu sawiin heng mite hian oxygen leh ventilator an mamawh lova, enkawl nan ZMC kher a ngailo tiin, a enkawlna tur district hrang hrangah Covid Care Centre (CCC) leh Dedicated Covid Health Centre (DCHC) ruahman fel vek tawh a ni a, COVID-19 vei hmuhchhuah belh zel a nih pawhin CCC leh DCHC hi ruahman belh zel a ni ang, a ti.
COVID-19 hrilengin mihring rilruah a thalo zawngin a nghawng thei tih sawiin thinurna, rilru hahna, ngaihtuahna fim hman theihlohna, huatna, inthinhrikna leh indemna te a siam duh em em a. Zaidawhnate, inlainat tawnnate, inhriatthiam tawnnate mahni inveng fimkhur si a kan neih a ngai a ni a ti a, tute pawh hi COVID-19 kai thei dinhmuna ding vek kan nih avangin he natna lo kai palh te pawh diriam leh dem ngawt lova, a tulna hmunah chuan hlau leh thinhrik lova enkawl a, infuih tawn a inchhawmdawl tawn tur kan ni tih a sawi.
Health Minister chuan COVID-19 vei kan neih belh takah hian mipui rilru hrehawm leh manganga kan awm laiin social media ah mipui ti chi-ai leh tithlabar thei thu belhchian dawllo thehdarh ching kan tam a ni a ti a, thudik pawh nise mipuite tana dawnsawn nuam tur leh an rilru tihah belh lo zawng thei ang bera sawichhuah a pawimawh a ni a ti a, social media a thubelhchian dawllo leh dawt thehdarh thinte chu sim tura ngenin a tul angin sawrkarin a umzui ang a, hremna pawh pek an nih tur thu a sawi a ni.
