N0.441/2020-2021

Vawiin khan IGP (Law and Order) Pu LH Shanliana hovin Aizawl SP Conference Hall ah police officer ten COVID19 dona kawnga Mizoram Police hmalakna hrang hrang an thlir ho.

COVID19 chungchang review meeting hi Pathianni tin an nei thin a, vawiin meeting hi a tum 4-na a ni.  Mizoram Sawrkarin March ni 22 ah lockdown a puang a, rampum lockdown  ni 21 chhung neih a nih tur thu chu March ni 25ah India Prime Minister-in a puang ve leh a. COVID19 vei an pun tak zel avangin hemi hnuah hian lockdown thawhhnihna puan a ni leh ta a. March ni 16 atang khan Mizoram Police-te hi ni khat mah chawl lovin vawiin thleng hian an duty a, lockdown awm chhung zawng chuan he an hna hi ngawrh takin an thawk chhunzawm zel dawn a ni, Pu LH Shanliana chuan a ti. 

IGP (L&O) sawi danin tun dinhmunah khawchhak leh khawthlang ramri hrul hmun 135 ah police ten venhimna hna an thawk a, heng hmunah te hian police 700 vel duty reng ang an ni a. Village Level Task Force-te hi hmun 198 ah mi 2000 aia tlem lo nitin an duty bawk a. Police te leh mi tlawmngai rual inpe VLTF leh LLTF te nen thawhhohna tha tak neia tangruala an thawh avangin tun thlengin kan la him a ni, Pu LH Shanliana chuan a ti. 

Contact tracing hi DIG(Northern Range) kaihhruaina hnuaiah police officer 15 leh police mi leh sa dang engemawzatin an thawk a. Law and Order bikah point 182 ah mi 1776 an duty a. Police station hna kal lai pangngai leh Police duty dang hrang hrang te chawl lova kal reng piahlamah COVID19 kaihhnawiah englaipawhin Mizoram hmun hrang hrangah police mi leh sa 2500 aia tlem lo ten nitin venhimna hna an thawk a ni.  Police in service training chhuak hlim mi 170-te pawh duty tura tirh chhuah nghal an ni a. Khawthlang lam ramriah mamawhna a san avangin an zinga mi 70 te hi tirh thlak an ni.

Vawiin meeting-ah hian COVID19 kaihhnawiha an duty-na hmuna tun hnaia thi - Havildar F Lalthansanga leh Constable PC Vankhawpuimawia sunna hun an hmang bawk a ni. Meeting-ah hian Pu Lalhuliana Fanai, DIG Eastern Range leh Pu Laldingluaia, DIG Armed Branch ten tun hnaia Khawchhak ramri-a Police duty leh khawthlang ramri a duty hmun hrang hrang an tlawh kualna report tawi an pe bawk.