No.825/2020-2021

Lawngtlai, Tomir thla ni 5, 2020: COVID-19 vanga inkharkhip kalpui mekah mipui tawmim thup mah se, sual erawh a tawmim ve kher lo thei a, thenkhat tan naupang chunga hleilenna sual pawi tak thlentirna remchang a nih theih avangin District Child Protection Unit (DCPU), Social Welfare Department, Lawngtlai District chuan hemi ven kawnga hma lakpui turin Lawngtlai District mipuite a ngen.

District Child Protection Officer Pi Mary Lalremruati chuan mipat hmeichhiatna chungchanga naupang khuaikhemtu tam zawk chu an chhung hnaite leh thenawm khawvengte an nih thin avangin tuna inkharkhip hi chuti ang pawi khawihtute tan chuan chetna remchang tak a ni thei tih a sawi a. Heti ang tawhsual laka naupangte an him theih nan mit lenpui a, beng chhitpui a, DCPU hma lakna tanpui turin mipuite a ngen a ni.

Lawngtlai DCPU-a thawkte hian naupangte himna atan theih tawpin hma an la reng a. Inkharkhip karah hian fimkhur leh zual zawka hma lak a tul avangin mipuite tanpuina pawh ngenngawl takin an dil a ni.

Mipat hmeichhiatna kawnga naupang chunga pawi khawihna mai piah lamah hian, harsatna dang hrang hrang tawk naupang - damlo buaipuitu nei lo leh enkawl ngai te, taksa leh rilru tihnatsak tuar leh ei tur nei lote pawh DCPU hian a buaipui thei vek a. Heti ang harsatna tawk an awm chuan a remchang apiangin a hnuaia biak pawh theihna (contact number) tar lanah hian a rang lama be pawp a, naupangte harsatna sut kianpui turin DCPU chuan Lawngtlai District mipuite a ngen a ni:

1. HL Rinawma, Chairperson, Child Welfare Committee - 9436346370
2. R. Lalrammuani, Member, Child Welfare Committee - 9436148419
3. Vanlalhlupuii Fanai, Member, Child Welfare Committee - 9436148009
4. Mary Lalremruati, District Child Protection Officer - 8794395045
5. PC Malsawmtluangi, Protection Officer (IC) - 9862313031
6. Zohlimpuii Hmar, Protection Officer (NIC) - 9612715193
7. VL Hmachhuana Khiangte, Legal cum Probation Officer - 8415851606