Vawiin hian Serchhip District Magistrate Pu. H. Dolianbuaia chuan Novel Coronavirus (COVID-19) leng mekah district mipuite him zawk nan a hnuaia mi ang hian thupek a tichhuak.
Khawvel ram hrang hrang in natna țihbaiawm a buaipui mek COVID-19 chu India ramah pawh alo darh mek zela, Mizoram țhenawm State ah pawh hmuhchhuah alo ni ta zel a, chuvangin kan District chhungah he natna țihbaiawm lak taka kan lo fihlim theih nan khapna thupek chhuah țulin ka hria a.
Hei mai bakah hian CM hova "Emergency meeting on Coronavirus (COVID-19) Dt.09.03.2020" a neih leh Chief Secretary hova "State Level Task Force on Mitigation of Coronavirus(COVID-19) Dt .10.03.2020" a neih chuan he hripui COVID-19 laka kan State a lo him theih nan mipui punkhawm khap leh ramri te ven uluk a țul thute, hmalak nghal tur anih thute rel a ni bawk a.
Chuvangin COVID-19 hrileng hi a darh zel lohna turin leh mipuite kan him tlanna turin kei H.DOLIANBUAIA MCS, DISTRICT MAGISTRATE, SERCHHIP DISTRICT hian section 144 of Cr.PC 1973 in thuneihna min pek angin hetiang hian thuchhuah ka siam a mitin ten zawm țheuh turin kan inngen e.
1. Serchhip District chhungah vantlang punkhawmna lam chi reng reng huaihawt khap tlat a ni.
2. Serchhip District chhungah Foreigner lo luh khap tlat a ni a, țul bik thilah chuan District Admistration phalna lak hmasak hnuah chauh luh theih a ni ang.
3. Serchhip District chhungah State pawn ami lo lut te leh District chhung ami, State pawn leh ram dang (Foreing) a hnathawka awm leh zin te an lo haw anih chuan, thuneitute hnenah in report ngei ngei tura thupek a ni. Hemi kawngah hian khawtlang hruaitute leh NGO te pawhin hetiang mi an awm chuan thuneitu (District admistration te, Police leh Health Department) te hnenah hriattir vat tur a ni.
4. He thupek hian Center leh State Goverment Office kalphung pangngai leh sorkar in phalna a pek bikte a huam lo ang.
He thupek hian a hun hmaa sut leh anih loh chuan chhuah a nih ațanga thla 2 (two months) chhung a huam ang.
Vawiin Dt.16.03.2020 (Monday) hian he thupek hi court seal chhu in ka hming ka ziah hnan e,tiin. District chhung mipuiten tha taka he thupek pawimawh tak hi zawm tum theuh turin kan inngen a ni.
