No.2655/2021-2022

Aizawl, 20th October, 2021 : Vawiin khan SRHF-ZMC a COVID Task Force hotute, ZMC-a damlo enkawltute chuan hripui vanga nunna kan chan loh nan inringhlelte leh symptom neite chuan a rang thei ang bera sample an test vat vat a pawimawh hle tih an sawi.

Dr P.C. Lalramenga, Nodal Officer, COVID Task Force, ZMC chuan ZMC ICU a damlo an enkawlte dinhmun an zirchiannaah sample test hma a, hri kai tih inhriatchhuah vat a inenkawl nghal hi a pawimawh hle tih sawiin hei hian an rilru a luah hle tih a sawi a, positive zat atanga chhuta nunna chan kan tlem hi a lawmawm kan tih rualin ICU a serious taka lut zing an tlem phah si lova, an zingah nunna chan an pung zel si a nih bawk chuan thil lawmawm a ni lo a ni a ti a. Nunna chhan hi kan tum ber a ni a, a tuartute tan a nat bakah keini damlo enkawltute pawhin na kan tiin hrehawm kan ti ngawih ngawih a ni, a ti a. Inringhlel leh symptom neite chu rei rial lova anmahni veng/khua Task Force te emaw medical mi hnaivaite hriattir a, sample testna hnai ber kiosk/damdawi in etc. pan vat turin a chah a ni.

Dr Lalnunmawii Sailo, Associate Professor, Anaesthesilogy & ICU in-charge, ZMC pawhin ZMC ICU a damlo serious tak tak admit te zingah hritlang satliah mai mai ti a palzam tum an tam tih sawiin, a tirah engah vak an ngaih loh avang leh dam leh mai tura an in ngaih avangin an ngaihthah a, a lo rei deuh a, a serious tak hnuah sample an han test a, an positive tih an inhriat meuh chuan ICU a luh ngai khawpin a lo tlai hman tawh thin a ni, a ti a. COVID-19 hri kaite chu hri an kai tirh atanga serious taka awm nghal an ni ngai lova, thalai hrisel te leh mi chakvak te chuan hritlang pangngai angin na vak lovin an dampui a ni thei a, hri kai zawng zawngah a ni thei lova, a bik takin thalaiten inah hri hawnin an chhungte an kai a, anmahni chu an dam nghal pawh a ni thei a, an kaichhawn an chhungte zinga natna benvawn nei leh tar chak lote, hriselna pan te erawh chuan na takin an tuar thei a ni, tiin mitinin kan chenpuite leh kan bul hnaia awmte kan ngaih pawimawha kan fimkhur a tul a ni, a ti.

Mahni inringhlelte leh symptom neite chu a rang thei ang bera in test vat a tul thu sawi velehin Dr Lalnunmawii chuan damdawi kan nei tha tawh a, hri kai tih inhriat veleh a Monoclonal Antibody Cocktail (MAC) khai nghal vat a nih chuan ICU a luh ngai em em lovin a inenkawl dam theih thin a, an nat serious a, ICU hialte an lut tawh a nih chuan MAC khai hian awmzia a nei tawh lo a ni, a ti.

In test hnuah negative mah nise symptom an neih chuan in test nawn fo tur tih sawiin, RAgT test negative, RT-PCR ah pawh negative tho, symptom neih si vanga in test nawn te zingah RT-PCR vawi hnih thum test hnu a positive tih hriatchhuahte an awm thin a, RT-PCR a vawi 4 in testna a positive te pawh an awm tih a sawi bawk.

Vaccine lak pawimawhzia sawiin ZMC a COVID-19 vanga nunna chan zinga 16% chu vaccine full dose la an ni a, 24% hi vaccine first dose la hman niin, a bak zawng 60% hi vaccine la lo an ni a ti a. vaccine la tawh zinga nunna chante hi natna khirh tak chi hnih/thum lai neite leh kum 80 chunglam te an nih thu a sawi bawk a. ZMC a COVID-19 positive an enkawl sa ICU a an admit aiin pawn lam atanga refer ICU a dah luh nghal ngai khawpa serious hi a let tam tak an ni tih sawi bawkin refer hma leh tlai hian thui takin awmzia a nei a, chumi tur chuan in test vat a, hrikai inhriat veleha inenkawl hian nasa takin min veng dawn a ni, a ti.

Dr. HC Laldina, Medical Superintendent, ZMC pawhin mask kan hman danah kan fimkhur a ngai tih sawiin, mahnia kan awmin mask kan vuah tha a, thiante kan kawm leh mi zinga kan awmin mask kan la thla leh thin hi a pawi a, kan tawng reng rengin kan hmui leh hnar khuh in mask kan vuah ngei ngei a tul a ni a ti a. ZMC-a an tawnhriat atangin hrikaite rawn awmpuite zingah tha taka englai pawha mask vuah, mutnaah te pawh vuah thin an awm a, heng zingah hian hri kai sawi tur an awm lo a ni, a ti.