No101/2021-2022

Aizawl, 12th, April, 2021 : Vawiin chawhnu khan Mizorama COVID-19 hri lo pung thar leh thut chungchangah Health Minister Dr. R. Lalthangliana chuan SAD Conference Hall-ah Health Department Officers-te a Meeting pui a. Health department anga an lo inpuahchah leh inbuatsaih dan tur relin, Mizoram hmun hrang hranga kan lo inbuatsaih dan tur te, hmalak mek chungchang te, vaccine indaih loh leh pek chungchang te, thawktu (manpower) indaihlohna leh lirthei indaihlohna phuhruk dan turte an sawiho a ni.

Meeting kaihruaitu Dr.R.Lalthangliana chuan Naktuk (thawhlehni) hian Airport-ah thlawhtheihna lian 4 a lo tum dawn a, passengers lo thleng an tam dawn avangin keini lam pawh kan lo inbuatsaih lawk a ni, a ti a. Lengpui Airport pawh amah ngeiin kar kalta inrinni a a tlawh thu leh inbuatsaih dan turte a enpui thu a sawi. COVID-19 lo hluar thar leh ta chungchangah tunkar ningani (15.4.2021) hian Home Minister leh Chief Secretary telin huam zau zawka Meeting neih leh kan tum a ni, a ti a. Vairengte chu khualzin rawn tamna a nih avangin kan uluk a ngai a, Vairengte Screening Point pawh zirtawpni hian tlawh turin kan inbuatsaih a ni, a ti. Aizawl Khawpui chhunga awlsam taka sample test theihna hmun (kiosk) dah belh chungchangah kiosk dahna tur veng neituten thawktu (manpower) indaihlohna phuhru tura mi pali/nga vel an lo tum ve theih chuan hmalakna a awlsam sawt ang, tih a sawi a. Vaccine indaih loh leh State hrang hrangin an inchuh chungchang health official-te sawi chu chhangin, Union Health Secretary tawngkai a a lo biak tur thu leh lehkha a ziah nghal bawk tur thu a sawi a ni. COVID-19 do chungchangah hian Health Department hi a Nodal Department satliah kan ni lo a, Health Department hian hma kan hruai a ngai a, department dangte nen tha taka kan thawhho zel hi a tul bawk a ni, a ti a. Minister chuan hma hun hriat lawk a nih loh thu sawiin, a chhe ber dawn chunga hrivei pung leh thut thei kan nih hria a, hemi dona leh venna atana mamawh chi hrang hrangte lo chhut chhuaka lo inhmakhawsuih turin leh phai lam (State dang) atanga lo hawte lakah Medical Team-te pawh uluk taka kan lo inrinlawk a ngai a ni, a ti.

Health & Family Welfare Board Vice Chairman, Dr ZR.Thiamsanga, MLA pawhin, chhiatni thatniah te khauh lehzuala tan kan lak leh a ngai a,ramri hmun hrang hrang atanga rawn luh tum an awm theih avangin hengahte hian tha taka kan duty a ngai leh dawn niin a langa, thawktu indaihlohna phuhruk turin tan kan lak a ngai hle bawk a ni, a ti.

Vawiin meetinga tarlan a nih danin tun dinhmunah hian Mizorama COVID-19 Vaccine pek tawh hi mi 92711 an ni a, tuna pek tura ruahman zat chu mi 202188 vel an ni. Vaccine hi chawhrualin ni khatah mi 5000 vel pek thin an ni a. Tuna Vaccine kan neih sa hi 50000 vel a ni. Hengte hian District hrang hranga sem turte a huam a, kan indaihlohna leh mamawhnate hi Central lamah Department hotute hian an lo thlen tawh thin a, mahse awmzia a neih hleih theih loh avangin, Mizoram Health Minister leh Chief Secretary te an pun a, anni hian hma an la nghal a ni. Health department hotute chuan PHC-ah te, Sub-Centre pawh tel vekin nitin mi 10000 an pek chuan kum 45 chin ruahman sa hi chu vaccine a lo thlen belh chuan pek zawh theih mai an inbeisei thu an sawi a ni.