No.414/2020-2021

Dr. ZR Thiamsanga, MLA, Vice-Chairman, Health & Family Welfare Board kaihhruai Covid-19 Medical Operational Team te chuan vawiin khan Hnahlan khaw tlangdung ramri depa khaw hrang hrangte leh Sialkal tlangdung khuate an tlawh a. Covid-19 dona kawnga inbuatsaihna leh hmalakna hrang hrangte thlithlaiin, an zirchianna leh hmalak zel dan tur leh thurawn dangte Sawrkarah an thlen dawn a ni.

Hnahlan VC House a Hnahlan VLTF te nena an inkawmhonaah Dr. ZR Thiamsanga chuan Sawrkar ruahmannain Covid-19 Medical Operational Team pali din anih thu leh an tum ber chu Mizoram puma Covid-19 dona kawnga hmalakna zirchiante, mipuite hnena zirtirna pek leh damlo awm thulh pawha enkawla, sawngbawl thlenga ruahmanna felfai tak siam turte, a tul ang zela sawrkara thurawn thlen thin tura duan anih thu a sawi a. Hri leng vanga kan ramin harsatna nasa zawk a tawh lohna tura kan ralthuam tha ber chu lo invenlawk hi a ni a, a taka thawktu tak takte chu VLTF leh tlawmngai pawl te an ni a, in harsatna te enfiaha lawmthu sawi tura lokal kan ni, a ti a. Saitual, Khawzawl leh Champhai District-te endik tawh chinah lungawithlak leh fakawm a tih thu a sawi a. Champhai District chu ramri thui tak nei anih vangin venhim pawh a hautak hle a, sawrkarin a tul ang zela puih a tum ani tiin, ramri daido a awmte chu theihtawp chhuah chhunzawm zela natna kaitanna leh tidarhtu nih tum lo tura tan la sauh sauh turin a chah a. Ral hmatawnga ding thin hriselna lama thawktute, Police, Village Level Task Force te, Media-te leh mimal, pawl leh Kohhran inphal taka tanpuina thawhtute leh PPE siamtu mithahnemngai tak takte chhuanawm a tih thu a sawi bawk.

District Level leh Damdawiin te inpuahchahna felfai tak chu fakin, hrileng mekin engtik thleng nge a awh dawn a hriat loha, kan hnaivai maia awm State leh ram dangteah an pung zel a, kan fimkhur lehzual angai takzet a ni, a ti a. Nakin hun a hriat loh avanga inrenchen thei ang bera khawsak a tul zia pawh tarlangin, ei bar lakna State-te'n harsatna an tawh ve mek avangin mipuite chu intodelh thei tura taima taka phak tawk anga hma la theuh turin a fuih a. Covid-19 Medical Operational Team Chairman chuan hrileng ven hna chu Health Department mal chauh tih theih anilo a, kan zavaia thawhho angai ani, a ti a. Covid-19 veite enkawlna tura ruat Hospital, Zoram Medical College-ah Covid-19 test-na khawl bunfel niin, Sample te test thin anih thu a sawi a. Hmanraw mamawhte pawh chah thlen teuh tawh niin, mamawh angte ngaihtuah zel ani a, India ram hmun danga tangkhangte rawn haw hunte pawh a la awm ang, Mizoram lut turte rang taka test theihna tur hmanrua 10000, Surgical Mask 100000, N95 10000, Glove 100000, Thermal Scanner 230 chuang chah mek niin, PPE 5000-6000 neih mek a ni a, mamawh dan anga chah zel tur a ni, a ti bawk. Rama riakte Thosi laka himna turin thosi thahna hlo hmanga Thosilen chiah thin turin a chah a. Sawrkarin State dang leh foreign-a tangkhangte tunah la kir theih rih lo mahse a ngaihven reng thu a sawi a. Mipuite chu ram leh hnam chhanna tura tlawmngaih chhuaha, natna ven kawngah theihtawp chhuah turin a chah a ni.

Pu Lalduhthlana, DFO Champhai, Hnahlan Hqtrs Area, Incident Commander nibawk chuan Hnahlan tlangdungin thahnemngai taka hma an lak thu leh sawrkar anga hmalak anih hma atangin khawtlang remruatnaa ramri ven hna lo kalpui tan tawh anih thu a sawi a. Village Level Task Force te chu harsatna awmte hotute hnena thlen vat thin tura chahin, ei leh bar kawnga nakin zela harsatna a awm lohna turin a theih theih thlai te chinga tun aia hmalakna zau zawk kalpui turin a chah bawk a ni.

Dr. R.Lianmawia, CMO Champhai chuan Incident Commander, Hnahlan PHC MO leh VLTF te inkara thawhhona tha tak awm chu fakawm a ti a. Undived Champhai District-ah hmanraw engemaw chen neih ani tawh a, mamawh dang angte pawn a tul ang zela Sawrkarin a pek dawn thu a sawi bawk.

Dr. R. Zatluanga, DMS Champhai chuan inkharkhip laiin Damdawiin Casualty leh OPD hawn reng anih thu sawiin, mipuite chu Damdawiin tawng pawh tlawh mai lova, loh theih lohah chauh pan tura ngenin, Doctor te phone number tarlan kaltlanga rawn mai turin a chah a ni. Dr. Lalrihlui, Hnahlan PHC MO hnen atangin Damdawiin inpuahchahna leh hmanraw neih dan te ngaihthlak a ni bawk.

Covid-19 Medical Operational Team Member Dr. Lalrintluanga Jahau, Surgeon, chuan khawvel pum huap natna leng pandemic ah mihring za zela 60 te kai tura ngaih anih thu leh natna leng tur kan ven uluk hle a ngai a, anih loh chuan kan tun dinhmun nen chuan a huphurhawm rih hle a, lo invenlawk hi kan hmanraw tha ber ani, a ti a. Mipuite kut silfai fo turte, Hmaituamna Cotton Mask hmang thin tur leh tifai fo turte, feet 6 vel tala midangte hlata awm tum hram hram turin a chah a ni.

Team member dang Dr. C.Lalsangzuala, Psychologist chuan Covid-19 beihletna kawngah rilru a inbuatsaihna neih tel angaih thu leh chiai mai lova ngaihtuahna fim tak hman thiam angaih thu a sawi a. Ruihhlo ngai ramri kana kal thinte tam tham tak an awm avangin heng mite ven leh khauhkhirh hi angai a, ruihhlo ngai sim mekte khawtlang leh Kohhran tangrualin nun thar an neih theihna tura kan puih angai a ni, a ti bawk.


He hunah hian khawchhak tlangdun ramri dep tlawha thang mek CYMA Team aiawhin Pu Peter Chhakchhuak, CEC pawhin thu a sawi a. Sawrkar, VLTF/LLTF leh NGO te hmalakna avangin Covid-19 laka kan la him hram hram a ni, a ti a. CYMA CEC Member-te Team hrang hranga inthenin Mizoram fanchhuah tum anih thu sawiin, khawchhak team te'n Saitual District ramri dep leh Champhai District ramri depte an fankual thu a sawi a. Lockdown period zawh hnuah pawh fimkhur chhunzawm zel an tum thu sawiin, mipuite theihtawp chhuah zel turin CYMA hmingin a ngen a ni.

He hun hi Pu K.Khawremsiama, Hnahlan VCP chuan kaihruaiin, Task Force ah mi 40 dawn an awm thu leh Core Committee chauhin Covid-19 Medical Operational Team te an lo hmuah thu a sawi a. Covid-19 Medical Operational Team te, DIG Eastern Region leh Central YMA Team lamin an khaw tlangdung an rawn tlawhnaah lawmthu a sawi bawk. Pu Lalrotluanga, Vanapa Group YMA President-in Hnahlan Village Level Task Force chungchang report pein, Tiau dung ramri dep hmun 3 ah zantin mi 20-30 vel an riah reng thu leh khawchhung luh leh chhuahah duty post 2 siam anih thu a sawi bawk.

Medical Operational Team hian tukin khan Zote Village Level Task Force, Ngur Village Level Task Force, Vapar Village Level Task Force te tlawhin inkawmhona an hmanpui a. Chawhnu lamah Vaikhawtlang Village Level Task Force, Khuangphah Village Level Task Force,Kawlbem Village Level Task Force, Teikhang Village Level Task Force, Hrianghmun Village Level Task Force leh Mimbung Village Level Task Force te tlawh lehin heng hmunah te hian inkawmhona neiin mamawh hrang hrang Silpauline, Mask, Glove leh Sanitizer te an semchhuak zel a ni.

Medical Operational Team-te hi Champhai atangin Pu Lalduhthlana DFO, Pu Benjamin Zalawma Ralte SDC, Dr. R. Lianmawia CMO, Dr. Zatluanga DMS leh Dr. Lallawmkima DIPRO te'n an tawiawm a ni.