No.1116/2020-2020

Health & Family Welfare Minister Dr R Lalthangliana chuan Mizoram mi leh sa tangkhangte mi sing chuang hmun hrang hrang atanga an rawn haw belh zel dawn avangin inthlahdah lovin mitinte kan fimkhur zual sauh a tul takzet a, Covid-19 Mizoramah a darh loh nan tun hi fimkhur tul hun lai ber a ni, a ti. He thu hi vawiina Covid-19 laka invenna kawnga hmalakna leh inpuahchahna enfiah tura Lunglei District leh Hnahthial District-te a tlawhnaa a sawi a ni.

Heng District-ah te hian H&FW Minister chuan mawhphurna neitute kawmin Covid-19 laka invenna kawngah ruahmanna hrang hrang a siampui. 

Dr. R. Lalthangliana chuan COVID-19 do chungchangah Chief Minister Pu Zoramthanga leh sawrkar hotute kaihhruaina hnuaiah Mizoram chu India ram State te zingah inbuatsaih hmasa ber leh hmahruaitu te zinga mi kan nih thu sawiin lockdown pawh Central aia ni thum (3) a hmaa puangin Domestic Flight phei chu a khar hmasa ber kan nih thu a sawi a. Covid-19 do kawnga mawhphurhna chelhtu hrang hrang District Level Task Force, Local/Village Level Task Force, NGO, VC leh ramri-a duty mekte leh phal taka tanpuina thawhtu mimal, pawl, Kohhran  bakah  PPE siamtu mi thahnemngai tak takte chungah lawmthu a sawi a ni. 

Mizorama kan healthcare infrastructure chungchang te pawh sawiin Minister chuan tun dinhmunah ZMC-ah ICU khum pasarih (7) chauh a awm a, Covid-19 hri a darh vaih chuan a ram pumin kan buai hle dawn a ni tiin Mizoramin healthcare facilities kan neih that tawkloh avangin invenna lamah theihtawp kan chhuah chhunzawm zel a tul a ni, a ti a. Tunah hian Mizoramah positive case kan nei rihlova a lan avang hian kan thla a muang sual ang tih a hlauhawm a, kan fimkhur loh chuan sawrkar leh NGO-te, Local/Village Level Task Force bakah mipuiten hah tak leh rim taka hun engemaw chen kan lo beih ve tang tangna hi zan khat thil thu ah kan tichhe vek thei tih hria a sawrkarin tih tur leh tih loh tur a tih te tha taka zawm tlat turin mipuite a chah  nawn leh a ni.

Tin, Lunglei District leh Hnahthial District chu international boundary nei an nih avangin inthlahdah theilo an ni thu a sawi a. Lunglei District chu Mizoram chhimlam District dang pathum – Siaha, Lawngtlai leh Hnahthial te tan a pawimawh em em thu sawiin mipuiten Aizawl an pan zel a ngaih loh nan Lunglei District-ah healthcare infrastructure tih changtlun mek zel a ni a, trauma centre te pawh buatsaih mek niin ICU khum te pawh dah tum a nih thu Health Minister hian a tarlang.

Health & Family Welfare Minister chuan Chennai khawpuiah mizo kum 29 mi Covid-19 kai hmuhchhuah thar anih thu pawh sawilangin patient hi a dinhmun a that thu leh Covid-19 vei enkawlna hospital-ah admit niin enklawna tha tak a dawn mek thu a sawi.  

Minister hi Lunglei District-ah DC Pu V.Lalsangliana leh a thawhpuiten lo dawngsawngin Hnahthial District-ah DC Pu Vanlalmawia leh a thawhpuiten an lo dawngsawng a ni. Lunglei leh Hnahthial District-ah te hian official-ten an hmalakna report kim chang tak Minister hnenah hian an lo pe a ni. 

Minister hi Aizawl atangin Pu H. Lalengmawia, Secretary, H&FW, Dr F.Lallianhlira, Principal Director, H&FW, Pu J. Hmingthanmawia, Director, C&I, Pu Lalsawma Pachuau, Joint Director, DHS, Dr Lalmalsawmi Sailo, Jt Director DHME ten an rawn tawiawm a. Zanriah ei khamah Covid-19 Quarantine Facility Jawahar Navodaya Vidyalaya, Pukpui a tlawh hnuah Aizawl lam panin an haw leh dawn a ni. 

Tin, Pu H. Lalengmawia, Secretary, H&FW kaihhruaiin H&FW Department-te chuan Siaha District leh Lawngtlai District tlawhin heng District-ah te hian Covid-19 laka invenna kawnga hmalakna leh inpuahchahna an enfiah dawn a ni.