Vawiin khan Lunglei DC Conference Hall-ah Lunglei DLTF Chairman Bawrhsap Pu V. Lalsangliana kaihhruaiin DLTF leh khawpui chhung VLTF thenkhat hruaitute thukhawmin tun hnaia Lunglei District-a Covid-19 positive case hmuhchhuah tharte chungchanga hmalak leh chetlak dan tur ngaihtuahin an thukhawm.

DLTF Chairman Lunglei DC Pu V. Lalsangliana chuan Lunglei District-ah Covid-19 positive mi 47 zet enkawl dam niin hriselna tha tak nen CCC/DCHC atanga an chhuak thei chu Covid-19 do kawnga Lunglei District mipuite tan hona leh thawhrimna rah a ni tiin lawmthu a sawi a. Hrileng mekin engtik thleng nge a awh dawn a hriat lohva, kan hnaivai maia awm State leh ram dangah te a pung zel a, kan fimkhur lehzual a tul takzet a ni tiin mipuite chu sawrkar thupekte leh Medical lam thurawn te ngai pawimawha zawm zel turin a chah a. Lunglei District-a Covid-19 positive mi 10 enkawl mek chungchang pawh sawiin DC chuan heng mi te hi an zavaiin BSF mi leh sa te niin CCC - SIRD, Pukpui ah enkawl mek an nih thu a sawi a.

Heng positive case te chungchang ah hian Thawhtanni (06/07/2020) khan a hun laia Lunglei DC charge chelh tu Lunglei SDO (S) Pu M. Misael chuan BSF hotute meeting alo neih pui tawh a. 60 Bn, 61 Bn leh 131 Bn BSF hotute lo telin quarantine an kalpui dan te, sipai lo haw zel tur an la nei em tih te, COVID-19 awareness an mi leh sa te ah inzirtirna an kalpui a tul thu te an sawihova, an hmalaknate leh dinhmunte District Administration ah chip chiar taka report thin tura hrilh an ni. 

Lunglei CMO Dr Thani Pachuau chuan report pe in contact tracing la neih mek zel anih thu te, primary contact - te swab sample lak kim anih tawh thu te leh sample test mek zel anih thu a sawi. Hetih lai hian JNV Pukpuia BSF quarantine-te hriselna dinhmun vil turin H&FW Department atangin Medical Officer Dr ZD Zothansangi chu 06/07/2020 atang khan ruat a ni bawk. 

Lunglei SP Pu Stephen Lalrinawma chuan dan leh thupek kenkawh kawngah Police - ten theihtawp chhuah mek zelin mipuite chiai lo tur leh sawrkar thupek te zawm tha turin a chah a. BSF mi leh sa te Covid-19 an inkaidarh chungchangah FIR te pawh Lunglei Police Station-ah thehluh a awm tawh thu a sawi a. The Mizoram Containment and Prevention of Covid-19 Ordinance, 2020 behchhana an chunga action la turin Police lamin hmalak ngei an tum thu sawiin tun dinhmunah Covid Care Centre-a enkawl mek an nih avangin hemi chungchangah hian hmalak zung zung theih ala ni rihlo a ni, a ti. 

Vawiin meeting hian ngun taka a thlir hnuah Lunglei khaw pum emaw District pum huapa Total Lockdown kalpui lovin tun dinhmuna veng hrang hrang Lockdown lo puang/kalpui tawh ten kalpui chhunzawm se tih a rel a. Contact tracing swab sample result a zirin heng vengah te hian lockdown kalpui zel emaw hlih emaw a ni ang. Mahni venga lockdown puan ve tul ti te chuan Medical lam leh District Administration rawnin hriattir se tih a ni bawk. Hemi chungchangah hian DLTF atangin thuchhuah siam a ni ang.