No.3181/2020-2020

Vawiin chawhnu khan Dr H Lalthlangliana, Deputy Commissioner, Kolasib district chuan Covid-19 positive pakhat, DCHC, District Hospital, Kolasiba enkawl mek chu RT-PCR test nawnna result-ah a Negative tih hriat a nih tawh thu sawiin, Kolasib district-ah Covid-19 vei an awm tawh rih loh thu a sawi.

Dr H Lalthlangliana chuan Kolasib district chhungah hripui do nan khawtlang nen theihtawp chhuah a hmalak thin a nih thu a sawi a, thawhhona tha tak avangin Kolasib chu Covid-19 vei awm lohna district kan ni leh ta a ni, a ti. DC chuan Maj. Gen. Ajai Verma, Commandant, Counter-Insurgency and Jungle Warfare School (CIJWS), Vairengte nen sipai Quarantine leh sample test neih dan tur chungchangah an inbiak thu a sawi a, Major Sonakshi, CIJWS doctor pawh lo chhoin, ruahmanna kalpui dan tur te an sawiho bawk a ni.

CIJWS in tun a Quarantine Centre-a an hman mek hmunhmate chu Government Quarantine Centre anga enkawl zui tur a ni ang a, ei leh in an intum thung dawn a ni. CIJWS Management Team leh CMO, Kolasib te tangkawpin sample an la thin ang a, Sub-Divisional Magistrate in a vilpui thin dawn bawk a ni.

Dr H Lalthlangliana chuan Kolasib district Government Quarantine Centre-ah mi 157 an awm mek a ni, a ti a, ramri kan a bungraw phur motor khalhtute sample 36 laksak tawh te RT-PCR result a la Negative vek thu sawiin motor khalhtute hi Rapid Antigen Test neih sak vek an nih theih nan ruahmanna siam a nih thu a sawi bawk a ni.