No.3915/2020-2021

Vawiin August ni 7, 2020 khan ZMC Laboratory-a RT-PCR khawl hmanga swab sample test 146 zingah COVID-19 positive 5 hmuhchhuah a ni a. Kolasib district a Rapid Antigen Test hmanga sample endik 320 zingah 19 COVID-19 positive hmuh a ni bawk.

Hetih lai hian Lunglei Civil Hospital Truenat PCR Laboratory-a sample test 24 a negative vek thung a ni.

ZMC Laboratory-a COVID-19 hmuhchhuah tharte hi mipa 4 leh hmeichhia 1 an ni a, kum 27 - 41 inkara upa, Aizawl district-a mi 3 leh Champhai district-a mi 2 niin Assam Rifles 3 (Mizo - 2, hnamdang - 1) leh BSF sipai 2 an ni a. Assam Rifles te hi Assam atanga lo kir Quarantine facility a awm lai mek an ni a, COVID-19 symptoms an neilo. BSF 2 (Mipa leh hmeichhia, hnam dang ve ve) hi COVID-19 symptoms an neih ve ve avanga ZMC-a admit lai an ni a. West Bengal atanga lo kir leh positive contact atanga kai an ni.

Rapid Antigen Test atanga COVID-19 hmuhchhuah zinga 18 hi National Highway-306 siam vanga Sethawn leh Thingdawl inkara bungraw phur Truck tangkhang khalhtu driver leh handyman te an ni a, anmahni atanga kai chhawng ni a ngaih Sethawn mipa naupang kum 12 a upa a tel bawk a ni.

Truck driver leh handyman COVID-19 positive hmuhchhuahte hi mipa vek niin, kum 17-44 inkara upa an ni a. Assam atanga lo lut vek niin Silchar ami 11, Bagha ami 4, Dolchhora ami 2 leh Sildubi ami 1 an ni a. Kolasib district-a COVID-19 positive vei hmuhchhuah tharte hi Polytechnic CCC, Thingdawl- ah dahluh vek an ni.

Vawiina Lunglei Civil Hospital Truenat Laboratory-a test Negative te hi 61 Bn BSF Zotlang a mi 17 leh Tualchhung mi zin haw mi 7 te an ni.

Vawiin tlai khan Kolasib DCHC atang COVID-19 vei enkawl dam hmeichhia pakhat chu chhuahtir a ni bawk

ZMC Laboratory-a sample test zingah hian COVID-19 vei engemawzat test nawn an tel a, an zinga 15 chu an la positive chhunzawm a ni.

August ni 7, 202O a ZMC RT-PCR laboratory-a District hrang hrang sample test zat
 
Aizawl - 106 (Mipa - 72, Hmeichhia - 34)
Mamit - 34 (Mipa - 27, Hmeichhia - 7)
ZMC - 6 (Mipa - 1, Hmeichhia - 5)
Total - 146 (Mipa - 100, Hmeichhia - 46)
 
Total cases - 558
Active - 269
Cured/discharged - 289