No.3940/2020-2021
 
Nimin August ni 8, 2020 khan ZMC Laboratory-a RT-PCR khawl hmanga swab sample test 149 zingah COVID-19 positive 25 hmuhchhuah a ni a. Kolasib district a Rapid Antigen Test hmanga sample endik 497 zingah COVID-19 positive 3 hmuh a ni bawk.

Hetih lai hian Lunglei Civil Hospital TrueNAT PCR Laboratory-ah sample test 26 a ni a, positive sa test nawn 2 an la positive chhunzawm a, a dang 24 an negative vek thung a ni.

ZMC Laboratory-a COVID-19 hmuhchhuah tharte hi mipa 22 leh hmeichhia 3 an ni a, Aizawl district-a mi 24 leh Lawngtlai district-a mi 1 an ni.

Aizawl district a COVID-19 positive hmuhchhuah zingah hian BSF sipai 17, kum 24 - 44 inkar an tel a, an zinga 15 hi Uttar Pradesh atanga lo kir niin Andhra Pradesh leh Rajasthan atanga lo kir 1 ve ve an awm bawk. quarantine facility-a awm lai vek niin, COVID-19 symptoms nei an awmlo.

Aizawl district-a COVID-19 vei hmuhchhuah thar zingah hian positive contact atanga kai 3 awmin an zinga 1 hi frontline worker (doctor) sample laa kal thin a ni a, COVID-19 symptoms a neih avangin ZMC ah admit a lo ni tawh a ni. Positive contact dang 2 hi Mizoram Police, BSF quarantine lai mekte vengtu an ni.

Anni bak midang 4, Aizawl district a positive hmuhchhuah tharte hi mipa 2 leh hmeichhia 2 niin, an zingah hian hmeichhe naupang kum 5 a upa a tel a, 3 hi chhungkua niin Assam atanga lo haw an ni a. Tripura atanga lo haw mipa kum 33 mi a tel bawk a, an vai hian Quarantine Facility a awm lai mek niin COVID-19 symptoms nei an awmlo.

Lawngtlai district a COVID-19 vei hmuhchhuah hi hmeichhe naupang kum 7 mi a ni a, positive contact (a nu) atanga kai ni a hriat a ni a, COVID-19 symptoms a neih vanga sample test sak, positive ta a ni.

Rapid Antigen Test atanga COVID-19 hmuhchhuah 3 hi National Highway-306 siam vanga Sethawn leh Thingdawl inkara bungraw phur Truck tangkhang khalhtu driver leh handyman te an ni a, mipa kum 20 - 27 inkar, Assam a chengte an ni a, COVID-19 symptoms nei an awm rih lo.

August ni 8, 2020 a ZMC RT-PCR laboratory-a District hrang hrang sample test zat
 
Aizawl - 131(Mipa - 119, Hmeichhia - 12)
Mamit - 5 (Mipa - 3, Hmeichhia - 2)
Lawngtlai - 2 (Mipa - 1, Hmeichhia - 1)
ZMC - 11 (Mipa - 7, Hmeichhia - 4)
Total - 149 (Mipa - 130, Hmeichhia - 19)