Tunhnaia State Referral Hospital, Falkawn a COVID-19 natna avanga boral ta ni a thu thang chu Laboratory Sample lak hman niin Guwahati Medical College Laboratory ah thawn nghal a ni a, zanin khan test result hi Health Department hotuten dawngin Coronavirus natna a vei loh thu  leh natna dang vanga boral a ni tih finfiah a ni.

Hemi rual hian damlo dang pahnih sample thawn result pawh dawn nghal niin anni pawh hi Negative result a nih thu dawn a ni.

COVID-19 natna kan state a a rawn luh loh nana hmalakna hrang hrang te chu nasa leh zuala kalpui mek a nih rualin mipuite pawhin heng hmalakna te hi kan zavai atan a ni tih hria thuawih taka tawiawm zui zel turin Health department chuan mipuite a ngen a ni.

Home quarantine a awm mek te pawh thahnemngai tak leh chhel taka lo awm zel tura ngen in  pawn chhuah chungchangah pawh thil tul tak te a nih loh chuan mi zawng zawng mahni in lama tawm im tura ngen an ni.

Tul bik thil a bazar-ah leh dawrah ei leh bar  mamawh/chakkhai kan lam  a nih pawhin midangte nen inhnaih lo thei ang ber a awm thin ni se, khawlai leh kawngsir a inhawrkhawm thin te pawh  tun ang hunah hi chuan he natna pumpelh tur hian midangte hnaivai a awm lo turin Health & Family Welfare Department chuan  ngenna a siam a. Kohhran leh tlawmngai pawl hrang hrang ten nasa taka mipuite COVID-19 laka kan himna tura sorkar an thawhpui mek zel na ah chuan Health & Family Welfare Department chuan lawmthu sawi a ni.