No.3241/2019-2020

Mizoram Chief Minister kaihhruaina hnuaia Sawrkarin COVID-19 test theihna Laboratory Mizoramin a neih dan kawng dap mek kal zelah vawiin khan hemi chungchang ngaihtuah hian Health Minister Dr.R. Lalthangliana hovin a Office Chamber, MINECO-ah MLA panga, Chief Secretary leh microbiology lama mithiamten inrawnkhawmna ‘Consultative Meeting’ an nei a. Meeting chuan Mizoramin COVID-19 Test theihna Laboratory a neih theih nan hma lak dan tur ruangam a duang a, a tul dan anga zirchiang turin Health Secretary kaihhruaina hnuaiah Core Committee din an rel a ni.

Health Minister Dr. R. Lalthangliana chuan COVID-19 test theihna Laboratory Mizoramin kan neih theih dan kawng awm theite dapin a chak thei ang berin Sawrkarin Chief Minister hovin an ngaihtuah reng tih a sawi a. Chumi kal zelah vawiin hian Indian Council of Medical Research (IMCR)-in COVID test thei chin Laboratory a bithliah dan te, laboratory siamna atan a ruangam leh a hmunhma awm dan tur duante, khawl ngai te, a thla tela certification buaipui a ngaih thu te sawi lan a ni a. MLA te pawhin an ngaihdan zau takin an sawi a. Mizoramin COVID-19 Test theihna Laboratory a neih theih nana hma lak dan tur ruangam duanga, a tul dan anga he thil zirchiang turin Health Secretary kaihhruaina hnuaiah Core Committe din chu meeting in an rel a ni. Hemi chungchanga hriattirna pawh bawhzui nghal a nih tur thu Health Minister chuan a sawi a. Testing Laboratory hi vawilehkhata neih mai theih ani lo tiin nei turin a kalkawng a thui thu te, endikna hrang hrang vawi tam tak paltlang a ngaih thu te sawiin amaherawhchu Mizoram in a neih theih nan theihtawp chhuahin Sawrkarin hma a lak zel tur thu a sawi a ni.

Kum 2013 khan ICMR chuan ram pumah virus testna hmun Viral Research and Diagnostic Laboratory(VRDL) 160 din turin ruahmanna a siam a, tun dinhmunah Regional Level ah te, state tam zawkah leh Medical College-ah te hetiang hmun hi 100 chuang a awm mek a. January 2020 khan Pune a virus zirna hmunpui National Institute of Virology (NIV), Bio Safety Level 4 chauh hi COVID test theih nan ICMR hian a pawm a, chumi hnuah February 2020 khan VRDL 16, Bio Safety Level 3 nei te chu phalna a pe leh a. March ni 6 khan ICMR leh Sawrkar Laipui te chuan private a hetiang test ti thei Laboratory 53 ram pumah chinchhiahin phalna an pe leh a, heng Laboratory-te hi Bio Safety Level 3 nei vek tih finfiah hnuah phalna hi an pe chauh a ni.

Vawiin inrawnkhawmna ah hian MLA panga – Prof F. Lalnunmawia, Dr. K. Pachhunga, Dr Vanlaltanpuia, Pu L. Thangmawia leh Dr. Vanlalthlana te an tel a. Chief Secretary leh State Level Task on COVID-19 Chairman Pu Lalnunmawia Chuaungo leh SNO IDSP Dr. Pachuau Lalmalsawma leh mithiam – Prof. T.K. Dutta, Head, Department of Veterinary Microbiology, Central Veterinary & Animal Husbandry College, CAU, Selesih; Dr. Vanramliana, Asst. Professor, Department of Zoology, PUC; Dr. Gracy Laldinmawii, Microbiologist, Zoram Medical College; Dr. Lalrempuii, Microbiologist, Civil Hospital Aizawl; Dr. Jacinta Lalhmunsiami, Microbiologist, Zoram Medical College; Dr. Lalremruata, Microbiologist, Synod Hospital, Durtlang; Dr. Christine Sailo, Microbiologist, MZU leh Dr. Lalnunnemi, Microbiologist, Synod Hospital, Durtlang te bakah Dr. Pachuau Lalmalsawma, SNO, IDSP te an tel a ni.