No.7097/2020-2021  

COVID-19 vaccine chungchanga hmalakna kal zelah vawiin khan Prime Minister Pu Narendra Modi chuan state leh UT tin Chief Minister leh Lt. Governor te Video Conference kaltlangin a kawm. Mizoram Chief Minister Pu Zoramthanga pawh a tel a ni.

India ramah COVID-19 vei zat chu tlahniam zelin, vaccine lak theih thuai tura ruahmanna siam mek karah mipuiin fimkhurna thlah lova, he natna hri laka him thei tura zawm tur pawimawh hrang hrang "COVID Appropriate Behaviour" chu zawm chhunzawm zel a pawimawh thu Prime Minister chuan a sawi a ni.

Secretary, Ministry of Health and Family Welfare in report a pek dan in Health Care Worker (vaibelchhe 1 bawr vela chhut) te hnenah pek hmasak an ni dawn a, Front Line Worker (mi vaibelchhe 2 vel) leh ngaihpawimawh bik - mi kum 50 aia upa leh kum 50 hnuai lam, natna benvawn nei (mi vaibelchhe 27 vel) ten an dawt leh ang. Health Care Worker leh Front Line Worker te vaccine lak man hi sawrkar laipuiin a tumsak tura ruahman a ni.

State leh UT tin chu January ni 16, 2021 hma in vaccine la tura ruahmanna siam ngai zawng zawng te an peihfel tawh tur a beisei an ni a. COVID-19 vaccine hi dose hnih (2) a lak tur a ni a, dose pahnih inkarah hian ni 28 a tla a. Dose vawi hnihna lak hnu ni 14-na atangin vaccine hian a hna thawh tur dan dik takin a thawk tan a ni.

Mizoramah chuan Covid-19 vaccine atan hian State Steering Committee, State Task Force, District Task Force leh Block Task Force on Covid Vaccine din niin hma an la a. Sawrkar laipuiin a beisei angin Database ah Healthcare worker 14,000 chuang register tawh a ni a. Frontline worker te data khawn mek a ni. Kumin January ni 2 leh ni 8 khan Covid Vaccination Dry Run chu district tinah neih a ni a. January ni 16 2021 a ram puma Covid Vaccine tlangzarhna tur atan vaccination site hmun pali (Aizawl Civil Hospital; Kulikawn Sub-District Hospital, Aizawl; Urban PHC, ITI, Aizawl leh Civil Hosital Lunglei) thlan a ni. Covid vaccination chungchangah hian state, district leh block level ah training pek a ni bawk.

Vawiin meeting-ah hian Chief Minister Pu Zoramthanga chu Health Secretary Pu H. Lalengmawia leh NHM Mission Director Dr. Eric Zomawia ten an tawiawm a ni.