No.1981/2020-2020

Vawiin khan Health & Family Welfare Minister Dr. R. Lalthangliana chuan a pisa ah Mizoram COVID-19 dinhmun sawifiahin, COVID-19 vei kan pun belh zel a rinawm rualin a vei sa te hi thalai taksa chak lai an ni a, dinhmun thalo leh ngaihtuahawm an awm lova, ni reiloteah hian a damchhuakte chanchin thu lawmawm kan hriat chhoh tan hmel a ni, a ti.

Health Minister chuan COVID-19 in kan nunphung thla thum vel min tibuai ta a, mipuite tan pawh a hrehawmin a beidawnthlak viau ang tih a hriat a. Chutih rual chuan hemi kaihhnawiha tha leh zung phunnawi miah lova sengtu zawng zawngte an fakawm a ni, a ti a. Sawrkar hnathawk, tlawmngai pawlte, VLTF leh LLTF bakah a bik takin tunhnaia District hrang hranga swab sample latu lab technician-te leh a test tu ZMC Laboratory a chhun zan zawma riahchilh a thawktute an hah in an rim hle a, an chungah lawmthu ka sawi rualin an hriselna leh an taksa damna atan kan tawngtaipui reng a tul a ni, a ti.

Health Minister chuan thawktu indaihloh karah mi tlawmngai mi fel tak tak an lo pen chhuak hi a lawmawm hle a ni, a ti a. Tunhnaiah Champhai, Haulawng leh Ramhlun veng, Aizawl bakah hmun dang dang atangin hlawh phut miahlo thalai, an thiamna te ram leh hnam tan a rawn hlan an awm hi hi a lawmawm takzet a, nimin lawka Saitual thalai 26 zet mai MSc Nursing, BSc nursing bakah driver atan te leh an tangkai theihna apianga chhawr tangkai tura Saitual District Hospital-a in volunteer an awm te, Lunglei leh Hnahthial bakah hmun hrang hrangah NCC leh zirlaite police force te puibawm tura an in volunteer bakah NSS unit hrang hrangte pen chhuah dan han hriat hian mizo nih a nuamin he natna do tur hian kan inlungrual tlang a ni tih a hriat a, kan hneh ngei pawh ka ring tlat a ni, a ti.

Tangkhang lo haw te phurtu Bus leh Sumo driver te an fakawm a tih thu leh an huaisenna leh an inpekna hlu a tih thu a sawi a, tangkhang lo haw mek leh lo haw tur an la awm a, anni hi India ram chhung leh pawn atangin hun harsa tak paltlangin mahni inpui thlahlelin an lo haw dawn a,an rilru tina lo ila, tha takin ilo lawm ang u,a ti a. An tan sawrkarin ruahmanna tha tak a siam a, an lo thlen veleh quarantine an ni ang a, positive an awm palh pawhin sawrkarin enkawl dan tur a ruahman fel vek a, pawn lam mi nen in tlawhpawhna chance a awm dawnloh avangin midang tan lo huphurh emaw, lo hlauh emaw khan awmzia a neilo, a ti.

COVID-19 dona kawnga ramri leh hmun hrang hranga fehchhuak zingah damlohna in a tlakbuak leh nunna hial chan phah te an awm tih a hriatin a pawi a tih thu a sawi a, nimin lawkah Sangau nula kan vui liama, a hma in Mizoram police mi leh sa pahnih ramri a duty lai an boral tawh bawk a, Zawlnuam lamah pawh ramri a duty chesual an awm tih te kan hria a, a pawi ka ti takzet a. Heng bakah hian tlawmngaia ramri a duty tura fehchhuak YMA, VLTF te kan hre reng a, malaria leh natna dang dang karah him taka in awm theih nan kan tawngtai reng a ni, a ti.
Health Minister chuan Chennai atanga lo haw Quarantine hun hmang zo tawhte pawh tunah hian chhui leh mek an ni a, chhui hna pawh kan zo thawkhat tawh a, sawrkarin a tih tur a hria a, ruahmanna fel tak a nei, a ti a. Test pawh tih sak leh vek tur niin a tul angin contact tracing pawh tihzel a ni ang a ti. RAT hmanga endik pawh a tul anga kalpui tur tih sawii, tun hun hi Chennai atanga lo haw te RAT hmanga test hi tun hunah a pawina a awm lova, RAT enchhinna (trial test) pawh Mizo COCID-19 vei dam leh te ah hlawhtling takin neih a ni, a ti.

Quarantine hun chhung ni 14 ni tawh lovin ni 21 a nih tawh zawk thu sawiin Quarantine Facility a awm mekte an thuawihna a fakawm a ni, a ti a. Khua a luma an awmna hmun pawh a hrehawm viau maithei, nangni leh keini sahimna tur a ni tih hria a thuawih taka awm chhunzawm zel turin ka chah duh che u, a ti a ni. Mipuite thuawihna a lawmawm tih sawiin, midangte tana dawnsawn nuamlo leh rilru tina thei, a bik takin Quarantine a awm mekte leh positive te leh an chhungte tana hriat nuamlo thil sawi chhuak lo tur leh, social media ah thubelhchiang dawllo leh dik ziktluak lo thehdarh lo hram hram turin mipuite a chah bawk.

Health Minister chuan Sawrkar theihtawpin a fimkhur a, tun dinhmunah community spread a la awm rihlo ni a hriat a ni, a ti a. Sawrkar department hrang hrang thawhhona a tha a, tlawmngai pawlte leh IMA, NGHAM te thahnemngaihna leh sawrkar an thawhpuina ah lawmthu sawi kan ba nasa hle a ti a. Mizoram sawrkarin Automated RNA Extractor thar a lei pawh hman theih thuai a ni dawn a, Forensic Science Laboratory atanga Automated RNA Extractor kan hawh pawh engineer ten uluk taka an en hnu ah hman theihin a awm tawh a, RT-PCR kan neih belh leh dawn a, Truenat khawl kan hmang tan thei tep bawk a, hetiang a nih chuan reilote ah nikhata sample 1000 chuang kan test thei tawhin a rinawm, a ti.

Health Minister c huanCOVID-19 hi zuam tur a ni lova, hlauh loh tur pawh a nilo, chutih rual erawh chuan fimkhur takin awm ila, sawrkarin tih tur leh tihloh tur a tih te zawm tha ang u, tiin mipuite a ngen bawk a ni.