Cricket Association of Mizoram(CAM) - in vawiin khan an President Pu Lal Thanhawla, Chief Minister hovin General Body Meeting cum Election Aijal Club-ah an nei.

CAM President Pu Lal Thanhawla chuan Mizoramah sports discipline dangte aia cricket chu tan tlai a nih thu a sawi a. UT kan nih laia Aizawl Sports Association pawhin cricket chu a ngaihtuah teh chiam ngailo a ni a ti a. India rama cricket hotupa thin Jagmohan Dalmia khan kum 1989 bawr vela Mizoramah cricket tan ve tawh se a tih thin thu sawiin, Lammual-ah khelh hmasak ber a ni a ti a. Tunah chuan hma kan sawn tawh hle a ni a ti.

Pu Lal Thanhawla chuan cricket game hi discipline tha leh hmalam hun eng nei tha (promising), Mizo thalaite thiam chi, eizawnna tlak leh sum tamna anih avangin kan uar chhoh deuh deuh a tul a ni a ti a. Cricket bil liau liau atana Sihhmuia stadium sakna tur ram a thlawn a petu chhungte fakawm a tih thu sawiin, tunah hian peih fel tep a ni a ti a. Board of Cricket Control of India (BCCI) hriatpuina, recognition kan la hmuh loh avangin a kal chakpui theih loh a ni a ti a.Chumi nei thei tur leh BCCI a Associate Member ni thei tura hma a lak dan te a sawi a. Hetah hian cricket lama mi pawimawh tak tak, Sharad Pawar te, Jagmohan Dalmia te leh tun hnaiah Arun Jaitley leh Rajeev Shukla te Mizorama cricket dinhmun chipchiar taka a sawipui thu te a sawi a ni. Chief Minister chuan cricket tih hmasawn nan chak lehzuala kal tum anih thu a sawi bawk.

Meeting hun hmasa zawk hi Pu K.Lalbiakthanga, Working President-in a kaihruai a. Chawhnu meeting hi Vice President Pu Lalrochuanga’n a kaihruai thung a, rorel inkhawmah agenda chhawpchhuah 8 te sawihona neih a ni a. Hruaitu thar thlanna an nei zui nghal a ni.