977/2025-2026

Aizawl the 27th June 2025: Vawiin khan I&PR Conference Hall-ah Mizoram CSR Cell leh Confederation of Indian Industry (CII) te tangkawpin ni thum chhung awh Capacity Building Workshop for NGOs & Implementing Agencies an buatsaih kharna hun hman a ni a. Chief Minister Pu Lalduhoma chuan khuallian niin a hmanpui.

Thu a sawinaah Chief Minister chuan, India ramah company tam tak an awm a, dan anga CSR thehchhuah tur hi an ngah a, a kum telin a pung zel. Chutiang a nih lai chuan Mizoram chu CSR dawng tlem ber state kan ni reng thin. CSR fund hmang hian ram hmasawnna hna, lian leh pawimawh tak tak a thawh theih a, Serchhip Hospital building sak nan pawh khian crore 21 zet kan hmu a ni. State dangte aia kan hnufual chhan hi CSR Implementing Agency kan neih tlem bik vang a ni deuh ber a, Implementing Agency tam zawk kan neih theih nana hma la turin Chief Minister Office-ah CSR Cell kan din ta a ni.

Kawng hrang hrangin hma an la nghal a, sensitisation programme an huaihawt a, Bangalore lamah UNDP nena tangkawpin Road Show an zuk nei a. Talk Show an buatsaih a, tunah CII nena tangkawpin he programme hi an buatsaih leh ta a ni. Kan mamawh hmasa chu registered agency tam zawk neih a ni avangin he training rawn chhimtu NGO ten Implementing Agency rawn nih ngei in tum tlat dawn nia, tiin a chah.

He programme chhimtu, kan Society, NGOs leh Hospital ten registered Agency nih theih ngei in lo tum ang a. CSR Cell hi nangmahni tanpuitu tura din a ni a. In rawn berawn zel thin dawn nia. Nakinah project te in thehluh hunah Chief Minister DO letter in mamawh hun te pawh a la awm ang. Chung hunah pawh chuan min rawn hrilh thin rawh u, kan lo pui ang che u. In hlawhtlin chuan in society in a hlawkpui ang a, thalaite tan hna in siam belh ang a, kan ramin kan hlawkpui dawn a ni, a ti.

Pu TBC Lalvenchhunga, Adviser to CM, CSR Cell Chairman ni bawk pawhin thusawiin, training chhimtute kal zelna turah CSR Cell chu biak theih reng an nih thu a sawi a. Implementing Agency nih tum zui ngei tura chahin, Implementing Agency leh CSR Donor company te indawrtawnna tur CSR Matchmaking Platform thar kan siam a. Kar leh lamah kan hman tan theih kan beisei, a ti.

A kharna inkhawm hi Pu Lalmalsawma Pachuau, Secretary Planning Secretary chuan a kaihruai a. Training chhimtute atangin an thil zir an hlawkpui dan ngaihthlak a ni a, Pu Lalrintluanga Jahau, Chairman, CII, Mizoram State Council chuan lawmthu sawiin inkhawm a khar a ni.