354/2023-2024

Lunglei the 8th May, 2023 – Corporate Social Responsibility (CSR) kaltlanga nikum November thlaa Lungleia lung lam leh cancer natna a thlawna inentirna ‘Free Cardiology & Oncology Health Camp’ neih hmalakna kal zelah phai hospital lama zai ngai lung natna nei mi sawm (10) te chu Shri Ramachandra Medical Centre, Chennai ah a thlawna zai leh an ni a, damdawiina an awm man leh an inenkawlna man zawng zawng te hi a thlawn veka tih sak an ni. He hmalakna kaltlang hian March thla khan naupang panga (5) hlawhtling taka zai anlo ni tawh bawk a ni.

Damlo zai ngai te hi anmahni hruaitute nen April ni 6, 2023 khan Chennai ah thlawk thla in, Shri Ramachandra Medical Centre, Chennai ah admit nghal an ni a. Damlote hi hlawhtling taka zai zawh niin an zinga mi pakua (9) chu April thla chhung khan Mizoram lo thlengin nimin khan ala awmchhun pakhat lo haw lehin an zavaiin an rawn thleng fel thei a ni. Tun tuma zai te hi hmeichhia panga (5) leh mipa panga (5) niin thla riat (8) atanga kum 54 inkar te an ni.

CSR kaltlanga Free Clinic hi Dr. JSN Murthy, Senior Cardiologist & Head of Cardiology, Sri Ramachandra Medical College and Research Institute, Chennai leh Pu Kulothungan A, IAS te hmalaknaa neih niin Sri Shankara Heart Foundation, Mathew foundation, Muthi Trust, Renyl Foundation leh Mr. Subramaniam ten sum thahnem tak an thawh khawm a. An inzaina, damdawiina an awm man leh an kal leh haw na zawng zawng te hi a thlawn veka tih sak niin ni 90 chhung ei tur damdawi an dawng vek bawk a ni.

Damlote tana theihtawp chhuaha an tana sum leh pai tam tak sengtute chungah Lunglei District administration chuan lawmthu a sawi a ni.