325/2022-2023
Aizawl, the 28th April 2022: Vawiin chawhma khan Mizoram Hindi Shikshak Sangh(CSS) hruaitute chuan Raj Bhavan-ah Governor Hari Babu Kambhampati an kawm a. Mizorama Hindi tawng tihlar a nih dan tur te leh Hindi Zirtirtute dinhmun siamthat ngai te an sawi pui a ni.

Governor Hari Babu Kambhampati chuan Hindi Teacher te Mizoramah rawih an nih dan te a zawt hmasa a. Harsatna an tawh chungchang leh Mizoram mipuiin Hindi chungchanga rilru an put dan te pawh chiang takin a zawt bawk. Governor Hari Babu Kambhampati chuan Hindi tawng zirtirna kawnga zirtirtute hmalakna a fak thu sawiin ama mimal ngaihdan chuan Hindi chu India ramah chuan Link Language(midangte nena kan inbiakna) tawng lar ber a ni a, zir uar pawh tha hle nia a hriat thu a sawi a. Mizo thalaiten Hindi nal taka an thiam chuan Mizoram state pawn Hindi tawng hman tamnaah chuan Hindi tawng thiamlo aiin an tlangnel ngei ngei dawn a ni a ti. "Amaherawhchu, eng tawng pawh ni se miin a zir duh leh a thiam duh chuan kan dodal thei lo a, zir tur erawh chuan kan nawr lui thei lo a. Tawng chungchangah hian fimkhur zawk leh mi rilru ti na lo hmalak a tha a ni", a ti. Governor chuan Hindi pawimawhna leh tangkaina te kan inhrilh tam chuan a zir duh leh a thiam pawh an pung sawt a, a rin thu a sawi bawk.

CSS Hindi zirtirtu te chuan Central Sawrkar atanga Scheme a awm apiangin rawih an ni a, scheme a tawp a piangin ban an ni a. Chutiang chuan tunhnaiah pawh harsatna tam tak an tawk thin a, a then te phei chu an kum a upat tawh hman thin avanga rawih nawn theih loh te pawh an ni a. Hindi teacher te hnathawh chu eizawnna ber atana hman ngam a harsa thin hle tih an sawi a ni. He an hnathawh leh eizawnna mumal lo tak hi siamthat a nih theih nan kawng zawn pui turin Governor chu an ngen a. India ramah Hindi a pawimawh em avangin nasa zawka kan thalaiten Hindi an zir a, a tawng an thiam a tul hle nia an hriat thu an sawi a. High School leh Middle School a Hindi zirtirna kalpui mekah Zirlaiten Hindi tawng an thiam phah vak lo nia an hriat thu leh Hindi Zirlaibu pawh tawng thiam theihna tur anga duan that te pawh tha an tih thu an sawi bawk a ni.

Hindi Zirtirtute chuan tunah hian Sawrkar Sikulah te chuan Primary leh Middle School ah te Hindi chu Subject pakhat anga zirtir a ni a, High School-ah erawh chuan duh a zirloh theih a ni thung a. High School-ah te Hindi subject chu compulsory subject anga zirtir a tul tawh hle nia an hriat thu an sawi bawk a ni.

CSS hnuaia Hindi Zirtirtute hi hun engmaw chen chawlhtir an nih hnuah tunhnaiah kan sawrkar chuan a la thar leh a. Kum 2021 ah mi 541 lak an ni a; kuminah mi 314 lak an ni leh tawh bawk a ni.