No.3649/2021-2022
Aizawl, the 13th January 2022: Vawiin khan Mission Organic Value Chain Development North East Region hnuaia Custom Hiring Centre hmanrua chi hrang hrang - Brush Cutter, Hand Hoe, Chilli Stem Remover leh Plastic Crates te chu Farmer Producer Company (FPC) hrang hrangte tan a thlawna an hman hawh theih turin Pu Rohmingthanga Colney, Agriculture Director chuan Directorate of Agriculture kawtah a vai liam.
He hmanraw thawn chhuah programme-ah hian Pu Rohmingthanga Colney chuan thlai thartute tana nihlawhna Sorkarin a ruahman thin chu lawmawm a tih thu sawiin loneituten heng hmanruate hi tangkai taka hmang turin duhsakna a hlan a ni.
Heng hmanruate hi loneituten chak zawka hna an thawh theihna tur leh an thlai chin azira an thar chhuahte tha zawk leh man man zawka an hralh chhuah theihna tura sawngbawlna te a ni a, MOVCD-NER hnuaia in-register, loneituten a thlawnin an hmang ang a, FPC-in an enkawl thung dawn a ni.
Tun tumah hian FPC 4 te hnenah heng hmanruate hi pek phawt a ni ang a, FPC dang 12 te hnenah pek chhuah leh tura ruahman a ni. Custom Hiring Centre hnuaia hmanrua pek chhuahna FPC te chu :
1. Sawhthing chingtu, Mawmrang Organic Farmer Producer Company Ltd., Pawlrang, Saitual District.
2. Sawhthing chingtu, Sialkal Organic Farmer Producer Company Ltd., Teikhang, Saitual District.
3. Lakhuihthei chingtu, Tuichangral Organic Farmer Producer Company Ltd., Khawhai, Khawzawl District.
4. Mizo Hmarcha leh Sawhthing chingtu, Zawlnghak Organic Farmer Producer Company Ltd., Rabung, Khawzawl District te an ni.
