Lawngtlai, Khuangchawi thla ni 27, 2020: Mizoram puma 26.10.2020 atanga 9.11.2020 inkar chhunga COVID-19 laka inven nana inkaihhruaina dan hrang hrang khauh zawka lekkawh tura 'COVID-19 No Tolerance Fortnight' ruahman chu Lawngtlai District chhungah pawh khauh taka kal chhohpui a ni a. Nimin leh vawiin khan dan bawhchhia mi 130 man niin, pawisa chawitir zat hi Rs 13,850/- a tling tawh a ni.

Dan bawhchhia mante hi a tam ber chu vantlang hmuna hmai tuamna (mask) vuah tha lo an ni a. Mi dang nena inhnaihchilh lo (social distancing) tura sawrkar thupek leh COVID-19 laka himna tura sawrkar ruahmanna dang (dawr register vawn) bawhchhiat vanga chawitir an awm bawk.

State sawrkar thupek angin Lawngtlai Bawrhsap ruahmannain sawrkar office hrang hranga thawktu 30% chu he fortnight chhung hian COVID-19 kaihhnawiha dan lekkawhtute tanpui turin an inpe a. Chumi atang chuan Lawngtlai khawpui veng hrang hrang chu bial panga (Zone 5)-ah thenin, mawhphurtu (COVID-19 Executive Duty) siam an ni a. Hei bakah hian Lawngtlai District Police te'n an dan pangngaiin COVID-19 kaihhnawiha dan lekkawh kalpui chhunzawmin, mipuiin dan an zawm a, COVID-19 laka an him theih nan beihpui thlak chhoh mek a ni.

District Disaster Management Authority chuan COVID-19 chungchang mipuiin an hriat chian leh zual theih nan zirtirna thuziak - banner leh poster eng emaw zat siamin, khawpui chhung hmun hrang hrangah tar a ni a. Sawrkar ruahmanna awm sa angin, nimin atang khan sawrkar office hrang hrangte'n COVID-19 laka fimkhurna tur kawng hrang hrangte poster siamin an office building-ah an tar hlawm a. Sawrkar hna thawkte'n COVID-19 laka him nana khawsak phung duhawm (COVID-19 appropriate behaviour) zawm tura intiamin, Jan Andolan Pledge an la hlawm a, vawiin khan Lawngtlai Bawrhsap office-ah pledge la in-report mi 41 an awm a ni.