Mizoram chhunga damdawi fai inelna, Kayakalp Award chu vawiin khan Lal Thanhawla Auditorium-ah Health Department buatsaihin sem a ni a. Health Minister Pu Lal Thanzara chu khuallian a ni.
Pu Lal Thanzara chuan mipui hriselna tura tihtur pawimawh hmasa ber chu thianghlimna a ni a, damlo tan leh a enkawltute tan damdawi in leh a chhehvelah thil thalo thlen thei bawlhhlawh leh hnuamhnawk dang a awm tur a nilo, a ti. Mizote hi zuk leh hmuam leh ruih theih thil dang kan tih nasat avang leh ei leh in kan uluk loh avangin hnam hrisel lo, cancer vei tamna State kan ni hi a zahthlak a, thangtharte helam kawngah thangharh a, taksa hriselna khawih pawi thei chin dawklak bansan turin a ngen a ni,
Health Minister chuan Lunglei Hospital atanga doctor sawnchhuah avanga Lunglei MZP-ten World Bank Road dan chah an tum chungchang sawiin sawrkar harsatna neih mekte hriatthiampui a, inhnukdawk turin a ngen a. Lunglei District tana zirlai pawlte thahnemngaihna a hriatthiampui rualin mipui tana rokhawlhna siam zawnga nuar lo turin a ngen a, remchang hmasa berah an duhna hi tihpuitlinsak ngei a tum thu a sawi. Minister chuan sawrkarin Lunglei a ngaih thah lova, District danga awm velo CT Scan khawl pawh Lungleiah dah tuma hmalak mek a ni a, Aizawl tih lohvah chuan doctor nei ngah ber an ni, a ti a. Mizoramah doctor indaihlohna a nasat em avangin inpeizawn dan ngaihtuah a, doctor awm lohna khaw hnaivai hmui turin ruahmanna siam tum a ni, a ti bawk.
India rama faina beihpui thlak Swachh Bharat Abhiyan tia vuah, Prime Minister in October ni 2, 2014-a a hawn hnu khan Health Department hnuaiah damdawi in leh a vel faina lam leh hospital a natna hrik titlem a, damlo chak zawka enkawl dam an nih theih nan Kayakalp-Swacchta Guidelines tihchhuah a ni a. Damdawi in fai inelna Kayakalp hi May 15, 2015 ah a lo piang ve leh a. Mizoramah chuan July ni 9, 2015 ah hawn niin October ni 5, 2015 ah inelna hmasa ber neih a ni. A bul tan nan District Hospital-ah chauh inelna buatsaih a ni a. Kuminah erawh District Hospital bakah Sub District Hospital /Community Health Centre leh Primary Health Centre level-ah te inelna siam a ni. Damdawi in fai inelnaah hian thawktuten nasa takin tan an la a, an ni bakah hian a khaw mipui theuhte leh khawtlang hruaitute tawiawmna a nasa hle a ni.
District Hospital ah Champhai District chu pakhatna niin pahnihna Serchhip District Hospital, pathumna Kolasib District Hospital te an ni. Pakhatna atanga pathumna te hian citation leh memento bakah cheng nuai 3 theuh an dawng. SDH/CHC ah Vairengte CHC chu pakhatna niin cheng nuai 10, citation leh memento an dawng a, Biate CHC in dawtin cheng nuai 4, citation leh memento an dawng a, pathumna Hnahthial CHC chuan cheng nuai 3, citation leh memento an dawng a ni. PHC level-ah chuan Aizawl West District ah Aibawk PHC, Aizawl East District-ah Thingsulthliah PHC, Kolasib District-ah Bilkhawthlir PHC, Mamit District-ah West Phaileng PHC, Champhai District-ah Hnahlan PHC, Serchhip District ah N.Vanlaiphai PHC, Lunglei District ah Buarpui PHC, Lawngtlai District ah S.Lungpher PHC, Siaha District-ah Chhuarlung PHC ten lawmman pakhatna an dawng a ni. Damdawiin fai tehna a 70% hmu pha District damdawi in pahnih, CHC pali leh PHC 37 hnenah commendation award sem a ni bawk.
