4772/2025-2026

Dated Aizawl, the 10th March, 2026 : Vawiin chawhnu khan DAY-NULM hnuaia sak, damlo awmpuitute riahbuk 'Patient's Attendants' Shelter' Dinthar Unit chu hawn a ni a. He hun hi Pu Lalmalsawma Pachuau, Commissioner & Secretary, Urban Development & Poverty Alleviation (UD&PA) Department chuan khuallian niin a hmanpui a, lungphun a hawng nghal bawk.

Khuallian Pu Lalmalsawma Pachuau chuan he hunah hian thusawina hun neiin, khual khua leh hmun hla zawk atanga damlo awmpuitute riahbuk tur tha tak vawiina hawn a ni thei ta chu a lawmawm hle a ni, a ti a. He riahbuk sak hlawhtlin a nih theihna tura hmalatu UD&PA Department hnathawh chu ropui a tih thu sawiin, a hmunhma phal taka petu leh a enkawltu YMA Dinthar Branch-te chu an fakawm takzet a ni, a ti a. Pu Lalmalsawma Pachuau chuan 'Patient's Attendants' Shelter' chu mi harsa zawk leh tanpui ngaite tanpuina hmun a nih zel theihnan a hmuna thawkte leh a enkawltute chu theihtawp chhuah zel turin a fuih bawk.

Vawiin riahbuk hawnna inkhawm hi Pu Jacob Lalawmpuia, State Mission Director, DAY-NULM leh Director, UD&PA Department ni bawk chuan a kaihruai a. Pi C. Lalduhzuali, Project Director, DAY-NULM leh Joint Director, UD&PA Department ni bawk chuan Technical Report a pe a. Dinthar-a damlo enkawltute riahbuk hi Shelter for Urban Homeless (SUH), DAY-NULM hnuaia sak niin, 160.84 square metre-a zau a ni a. Chhawng thum niin, khum 15 dah sa bakah Dinthar Branch YMA thahnem ngaihna-in khum engemaw zat dah belh a ni a. Mutbu leh bungrua engemawzat awmin, project cost hi cheng 48,32,023 a ni.

He hunah hian Dinthar Branch YMA member-te leh Local Council member-te an tel a. Pu V. Vanlalhriata, Secretary, Project Sub-Committee, Dinthar Branch YMA chuan kalkhawmte hnenah lawmthu sawiin hun a khar a ni.