No.4379/2020-2021

Ni 21 August 2020 khan Dr. Z.R.Thiamsanga MLA, Vice Chairman, Health & Family Welfare Board leh Chairman, Covid 19 Medical Operational Team Mizoram chuan Covid 19 hrileng kara natna hrang hrang avanga phai atang a rawn haw damlo ten harsatna an tawh loh nan meeting pawimawh tak a ko va.  Dr. ZR Thiamsanga chuan he meeting a kal te hnenah Damlo Mizoram chhunga enkawl theih loh phai pan ngei ngei ngai an awm reng thu leh an rawn haw hnuah pawh a then te chu ICU a awm nghal ngai te dialysis leh chemo lak zawm ngai leh damdawiin a enkawl nghal ngei ngei ngai te annih hlawm avangin quarantine centre a dah pawh a rem chiah loh thu leh chung damlo te Mizoram a an rawn haw huna an awmdan tur chu tha taka ngaihtuah sak an tul thu a sawi a.

 He meeting ah hian Zoram Medical College, Civil Hospital Aizawl, IMA, MGDA leh Non-Government Hospital Association Mizoram aiawh te an tel a.

He meeting hian State pawna damlo inentir leh treatment la a rawn haw, inenkawl chhunzawm ngai, natna khirh tak vei te leh quarantine an nih laia damlo damdawiina awm ngai bawk si, an quarantine hun chhung la zo lo leh positive an nih leh nih loh pawh la hriat si loh te enkawl dan tur chungchang chu ngun taka an ngaihtuah hnuah damdawiin danga dah lovin Zoram Medical College ah enkawl zel ni tawh se tiin an rel. Hetiang damlo te hi ZMC ah Quarantine period ni 14 an awm chhungin Covid 19 test tih sak an ni ang a. An quarantine period a zawh hnuah Covid negative apiang te chu an duhna emaw awm theihna hospital dangah sawn chhuah theih nise tiin an rel bawk. He rawtna hi sorkar hotu lian leh Health Minister hnenah thlen a niin, a ni pawhin a lo ngai pawimawh hle a ni.