1795/2026-2027
Lawngtlai, 14th August 2026: Vawiin khan Lawngtlai District Treasury Office - huaihawtin dan dik lova 'Family Pension' la te inhnukdawk tura inhrilhhriatna (Sensitisation on Voluntary Surrender of PPOs by Family Pensioners) chu DC Conference Hall- ah neih a ni a. Lawngtlai Bawrhsap Pu Donny Lalruatsanga chuan Khuallian niin a hmanpui.
Pu Donny Lalruatsanga chuan kalkhawmte chibai bukin, chuan sawrkar thuchhuak zawka dan dik lo a 'Family Pension' la te hun tiam chhung ngeia inhnukdawk turin a chah a. Sawrkarin uluk taka a ngaihtuah hnua thutlukna a siam a nih angin, khauh taka kalpui a nih tur thu sawiin, dan ang taka hmalakna kalpui a ni ang a ti. A dawngtu tur dik takin a dawn chu thil dik tak a nih rualin, a dawngtu tur ni loin a lo lak thin hian harsatna a thlen nasa hle tiin, sawrkar thawhpuia thuawih taka titawp turin a chah a. Dikna leh rinawmna vawngnunga dan dik lova Pension lak titawp turin Bawrhsap chuan a sawm nghal a ni.
Resource Person Pu Lalremzuala, Asst. Audit & Account Officer, A&T Southern Zone Lunglei chuan 'Family Pension' chungchanga hriattur pawimawh tak tak Power Point Presentation - hmanga sawifiahna a nei a.Mizoram sawrkarin dan dik lova 'Family Pension' la te tana inhnuhdawh hun a hawn chhung ngei a inhnukdawk tura an beisei thu a tarlang a ni. Pu C. Lalbiakkima, APP& AGA Lawngtlai chuan dan lova Pension la te hremna chungchangah zirtirna pe bawkin, zawhna leh chhanna hun hlawk tak hman a ni.
Vawiin hun hmanna hi Lawngtlai Treasury Officer Pu PL Hrangkhama chuan a kaihruaia. Sawrkar Head of Department leh Pension Dealing Staff te; Registrar of Births & Deaths; Lawngtlai Treasury hnuaia Family Pensioner- te; SBI aiawh, Village Council, NGO hruaitu,Kohhran hrang hrang aiawh, leh MJA Lawngtlai aiawhte an tel t swehei a, Pu K. Hmunsanga, AO Lawngtlai Treasury Office chuan lawmthu sawiin hun a khar.
