785/2023-2024
Lunglei the 13th June, 2023 – Tlabung Sub-Division, Lunglei District huamchhunga Dan lova khaw din (Unauthorized villages) chungchanga hmalak tul te ngaihtuahin vawiin khan Lunglei DC Conference Hall-ah Lunglei Additional DC Pu Donny Lalruatsanga hovin meeting neih a ni. Meeting-ah hian Lunglei SP Pu Rahul Alwal, DLAO Pu Beitlotha Nohro, leh P&E, PHE, H&FW, RD, EF&CC, I&PR, leh School Education Department officials-te bakah Sub Hqrs YMA Lunglei, Lunglei District Village Council Association leh Khawthlangtuipui Group YMA hruaitute an tel a ni.
Young Mizo Association: Khawthlangtuipui Group-te chuan May ni 3, 2023 khan Press Release chhuahin, an area huamchhunga Dan lova khaw din hengte - Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nakuksora, Gurusora, New Balukiasury, Balukiasury- chhuah leh Bandiasora a chengte chu June ni 14, 2023 hma ngeiin an parent village ah let leh turin an hriattir a. Hemi chungchang hi vawiin meeting ah hian sawiho a ni a.
Meeting kaihruaitu Pu Donny Lalruatsanga chuan Dan lova khaw din chungchang chu sawrkarin a ngaih pawimawh takzet thu saiin, kum 2019 khan Joint Inspection Team (JIT) din niin, inspection chipchiar tak neih a ni a, Covid-19 hrileng avangin hmalakna tih tawp lailawk anih thu a sawi a. Hemi kawnga hmalakna hi uluk leh fimkhur taka kalpui zel a ngaih thu leh mihring dikna chanvo (human rights) bawhchhe lo zawnga kalpui a tul thu a sawi a ni.
Meeting chuan SDO (C) Tlabung kaihhruaina hnuaiah official-te leh Khawthlangtuipui Group YMA hruaitu ten heng Unauthorized Village te hi July ni 15, 2023 ral hma ngeiin tlawh chhuak leh vekin, an dinhmun te zirchiang se a ti a. Department hrang hrangte chu Unauthorized village-ah te hmasawnna hna leh scheme te lo kalpui lo tura hriattir an ni bawk.
