2590/2022-2023
Champhai, the 9th November, 2022: Vawiin chawhma khan DFO Champhai Pisa-ah dan lova ramri kaltlanga nungcha tawlhruk chungchang ngaihtuahin Inter Agency Coordination Meeting neih a ni. He hunah hian India rama wildlife crime hrang hrang thleng thinte zirchianga a tul anga hma la thintu sawrkar laipui Ministry of Environment, Forest & Climate Change hnuaia Wildlife Crime Control Bureau (WCCB) hotuten District Official-te kawmna hun an hmang a; hmalak dan tur leh tul dangte an sawipui a ni.

He hunah hian Wildlife Crime Control Bureau (WCCB) atangin Dr. Manoj Kumar IPS, Joint Director (I&C), WCCB (DIG Police), Pu Agni Mitra IFS, Regional Deputy Director, Eastern Region, WCCB (AIG, Forests) leh Pu Arvind Kumar Chaurasia, IRS, Deputy Director, WCCB (AIG, Customs) te an tel a. Champhai District atangin SP Pu Lalrinpuia Varte, DFO Pu Lalduhthlana, Addl. SP Pu C.Lalengliana, DIPRO Dr. Lallawmkima, Honorary Wildlife Warden Pu Lalhlupuia, Assam Rifles OC Maj Akshay Dahiya, Customs Preventive Force Superintendent Pu K.M Donglian leh Official dangte an tel a ni.

Dr. Manoj Kumar IPS, Joint Director, WCCB (DIG Police) chuan tun kum hnih khat chhungin North East leh West Bengal hmar lamahte dan lova nungcha tawlh ruk a tam zual thu sawiin, hengahte hian Champhai kaltlanga tawlh a tam thu leh Indo-Myanmar border nimin lama tlawha zirchianna neih a nih dante a tarlang a. Ram dang atanga nungcha tawlh ruk man tam berte chu tunhnaia thleng a nih thu leh Sawrkar laipuiin a ngaimawh thute bakah ngun taka thlithlai reng a nih thute a sawi a. Wildlife Protection Act 1972 hnuaiah India rama nungchate khuahkhirh leh venhim tlat an nih thu sawiin, hemi dan hnuaia ram danga awm nungchate rin luh a, dan lova tawlhte ven leh khuahkhirh a nih theih nan he dan hi siamthat tum a ni a, reiloteah peihfel thuai tuma hmalak mek zel a ni, a ti a. Ramri kaltlanga nungcha tawlh luh mai bakah thawn chhuah thlenga tha taka veng tura tanrual a pawimawh thu a sawi bawk.

He hunah hian Pu Agni Mitra IFS, Regional Deputy Director, Eastern Region, WCCB (AIG, Forests) leh Pu Arvind Kumar Chaurasia, IRS, Deputy Director, WCCB (AIG, Customs) te hnen atangin India rama nungcha tawlh ruk dan leh a nghawng hrang hrangte ngaihthlak a ni a. District Wildlife Control Sub-Unit Chairman Pu Lalrinpuia Varte, SP leh Member Secretary Pu Lalduhthlana, DFO ten District Wildlife Crime Control Sub-Unit hmalaknate an sawifiah a. Dan lova nungcha tawlh ruk leh nungchate chunga pawikhawihna thleng thin ven kawngah lungrual taka hmalak thin a nih thu an tarlang bawk.

Thutkhawmah hian hmalak tawh dante zirchianna neih a nih bakah chak zawka hmalak zel dan turte inpawhtlang taka sawiho a ni a. Convention on International Trade in Endangered Species (CITES) hnuaia tarlan nungcha tawlh ruk mante chu Mizoram bikah Sahuan a tawt tawh avangin Chief Wildlife Warden berawn chungin hmalak zel dan tur Wildlife Crime Control Bureau lamah report zel ni se, hmalak chhunzawm chungchangah WCCB in hma lo la se tih a ni a. Mizoram Sawrkar EF&CC in Sawrkar laipuia nungcha tawlh ruk mante enkawl lailawkna tur Animal Rescue & Rehabilitation Centre din a nih theihna tura rawtna a thlen chungchangte pawh a tul anga bawhzui pui an tum thu WCCB hotute chuan an sawi a. WCCB hotute chuan District Crime Control Sub-Unit chu kokim thei ang bera joint patrolling tam zawk nei turin an chah a. Ramri dep State-te nen zau zawka inrawnkhawmna neih a tul thute pawh he hunah hian tarlan a ni a, Wildlife Protection Act 1972 siamthat a nih hnuah chuan ram dang atanga nungcha tawlhru mante chungah na zawka hremna lekkawh a nih theih tawh dawn thu pawh tarlan a ni bawk.

He huna tarlan a nih dan chuan January 2021 atanga October 2022 zawh thleng khan Champhai District chhungah force leh department hrang hrangte hmalaknain dan lova nungcha tawlhruk man chhuah tum 7 thlengin case ziahluh vek a ni a; nungcha species hrang hrang tawlhte hi avaiin 723 a tling a ni.

Wildlife Crime Control Bureau (WCCB) hotute hian nimin khan ramri enfiahin India leh Myanmar ramri depa awm Zokhawthar khua an tlawh a; Police, Customs leh Assam Rifles hotute hmuin an kawm nghal bawk a ni.