4996/2025-2026

Dated Aizawl, the 25th March, 2026: Vawiin khan District AIDS Prevention and Control Committee (DAPCC), Aizawl district chuan Aizawl DC Er. Lalhriatpuia, DAPCC Chairman ni bawk kaihhruaina hnuaiah DC conference hall-ah meeting an nei.

DAPCC Chairman chuan Mizoram hi India ram pumpuia HIV hluar berna state a ni chu pawi a tih thu sawiin, Mizoram chuan hmasawnna tur tam tak a la neih thu a sawi a. Chairman chuan HIV darh tur ven kawngah te, HIV test pawimawhzia leh HIV veiten tha taka treatment an lak a pawimawh zia nasa zawka inzirtirna campaign neih a tul thu a sawi a. DAPCC member kalkhawmte chu HIV do kawnga chak taka hma la zel turin a chah a ni.

Dr. R. Zonunmawii, District Programme Manager, DISHA, Aizawl District chuan Aizawl district chhungah puitiling zinga HIV vei awm zat hi 4.049% a ni tih tarlangin kum 15 - 49 inkarah za zelah mi pali (4) ang vel HIV hrik pai anga ngaih an ni. Kum 2025 chhunga Intensified Information, Education & Communication (IIEC) campaign-a an hmalaknate report a pe a. Kum 2025 October leh November chhung khan thingtlang khua 26 an thlanchhuah zinga mi 6504 hnenah leh an khaw hruaitute hnenah HIV chungchang chiang zawka inzirtirna campaign neih niin, HIV leh Syphilis test-te pawh tihsak an ni.

Vawiiin meeting-ah hian Mission AIDS Suraksha chungchang sawi ho niin Mission AIDS Suraksha GOAL 95:95:99 achieve theih nana hmalak dan turte sawi ho a ni a. 95:95:99 awmzia leh thil tum - People Living with HIV (PLHIV) 95% talin an nihna an inhriat theihna tura zau zawka test neih te; HIV hrik pai 95% ten Antiretroviral Therapy (ART) tha taka an lak te; ART latu 99% ten an thatpui a, midang kai chhawng thei lo khawpa viral load hniam an neih dan turte sawi ho a ni. Mission AIDS Suraksha-ah hian Aizawl District dinhmun thlir ho a ni a, tun dinhmunah Aizawl district-a PHLIV 94.5 % te’n an nihna an inhria a, 88.5% te’n ART la mekin, 98.3% te’n midang kai chhawng thei lo turin an thatpui a ni.

HIV darh zau zel tur venna kawngah chak zawk leh tha zawka Aizawl District-in hmasawnna a hmuh theihna turin Integrated Action Plan (IAP) for Aizawl District chu sawi ho a ni a. IAP hnuaia hmalakna tur thenkhatte  sawi ho niin mi tam zawkin HIV an kai leh kai loh an in test theihna turin Awareness campaign nasa zawka neih ni se tih te,  High Risk Group (HRG) te zingah HIV darh zel tur tha lehzuala ven theihna tura hma lak te, HIV kai te’n rang taka an inhriatchhuah theihna tura hma lak te, PHLIV te’n rang tak leh tha taka treatment an neih theihna tura hmalak te, a huhova khawsakna hmun Jail/Home-ahte uar lehzuala awareness kalpui dan tur te, YMA-te nena tha lehzuala thawh hona neih te, ARTC hlata awm, thingtlang leh hmun kilkhawr zawka awmte tan HIV test leh Counseling services awlsam zawka a awm theih nana lirthei Mobile ICTC leh Bikers Outreach Workers Services tih changtlung dan tur te, Social Benefit Schemes hrang hrang leh eizawnna tha zawk an hmuh theih dan turte rel a. DAPCC member kalkhawmte atangin rawtna hrang hrang leh hmalak zel dan turte ngaihthlak a ni bawk.