No.1969/2020-2020

Covid 19 avanga State dang atanga lo hawng Hnahthial District chhunga khunghran mekte awmna Quarantine Centre atan Darzo khawtlang chuan vawiin khan ei leh in tur thlai chi hrang hrang an pek bakah ramri a duty-te tan pawisa fai Rs.10,000 (Sing khat) leh Thingpuife an pe a, TKP Bazar Unit Hnahthial pawhin Quarantine Centre atan Rs.10,000 (Sing khat) an pe bawk.

Heng thilpek te hi Hnahthial District Task Force Chairman leh District Bawrhsap ni bawk Pu Vanlalmawia leh SP Pu Lalbiakkila te chuan DC's bunglow-ah an lo dawng sawng a ni.

Thilpek inhlanna hun tawi neihah Hnahthial District Bawrhsap Pu Vanlalmawia chuan "Covid 19 kan dona kawngah mipui kan tanrual zia a lang chho zel hi a lawmawmin tanpuina sum leh pai bakah ei leh in tur kan inpe thin te hian kan inngaihsak zia a lan tirin tlar hmasaa ding hmalatute tan a thlamuan thlak thin hlea ni" tiin Darzo khawtlang leh TKP Bazar Unit Hnahthial in tanpuina an pe chu lawmawm a tih thu a sawi a ni.

Hnahthial SP Pu Lalbiakkila pawhin "thilpek duhna thinlung hi a hlu hle a, chumi piaha a taka pekchhuah hi a hlu zualin a lawmawm thin hle a ni" tiin lawmthu a sawi a ni.

Darzo khawtlangin Quarantine Centre atana thlai chi hrang hrang an pekte hi Phuihnam, Antam, Sawhthing, Thingthupui, Bean, Maian, Anhling, Dania, Zo Purun, Iskut, Thingpuife leh Theite an ni a, Pick Up trip hnih zet a ni.