3721/2022-2023

Mamit 1st March, 2023 : Vawiin khan GSA Playground, Mamit-ah Deendayal Antyodaya Yojana - National Urban Livelihoods Mission (DAY-NULM) Festival puala Exhibition Cum Food Fest buatsaih chu Pu Lalnunhlua, Mamit District Bawrhsap chuan khuallian niin a hawng.

Khuallian chuan Sorkar-in hetiang Programme remchang tak mai a ruahman chu thil lawmawm tak a nih thu sawiin DUDO-in Chapchar Kut, mipui tam tak pun khawm hun inphochhuahna hun tura ruahmanna a siam chu fakawm a tih thu a sawi a. Self Help Group te chu thawhho thiam tura chahin Group tikehtu ni lova tiphuisuitu nih tum theuh turin leh mimal anga kan tih theih loh tam tak Group-in kan ti thei a ni tih hria a, hmasawn phah nana hmang turin a chah bawk.

Pu Zodinsanga, Manager, DAY-NULM Mamit chuan DAY-NULM hnuaia hmalakna hrang hrang tarlangin tun dinhmunah SHG 72 din tawh niin ALF Group 3 din tawh a ni a. Training Course hrang hrang Domestic Data Entry Operator, Beauty Technician, LMV Driver, Assistant Electrician, Mason General, Carpentry, General Duty Assistant, Paper Matche, Sampling Tailor bakah Baking Technician te pek an ni tawh a. SHG te tan March thla chhung hian Food Processing, Puan Tah leh Home Composting training neih leh tuma ruahman a ni bawk.

Vawiin Exhibition-ah hian SHG te'n an thil siam chhuah hrang hrangte Stall 30-ah pho chhuakin Exhibition hian March Ni 3, Chapchar Kut ni thleng a awh ang.

Exhibition hawnna hun hi Pu C. Sawihlira, DUDO, Mamit chuan  kaihruaiin he hunah hian Sorkar Officials te, khawtlang hruaitute, sawmbikte bakah thutharthehdarhtute an tel a ni.