Vawiin khan DC Conference Hall ah Kolasib DC Pu H. Lalengmawia, IAS leh Kolasib SP Pu C. Lalzahngoa hovin Kolasib khawpui chhunga Village Council zawng zawng hruaitute, Sub Headquarters YMA Kolasib, MHIP Sub Headquarters Kolasib leh MUP Sub Headquarters Kolasib hruaitute chuan Kolasib khawpui chhunga ran khuahkhirh leh Hunpui Krismas leh Kumthar vuak veta puak theih khap chungchangte sawi hoin meeting an nei.

Pu H. Lalengmawia chuan Kolasib chu khawpui thang chho mek leh changkang mek a ni a, kan khawpui hian tlawh leh paltlang a hlawh a, mi tam tak rilruah ran khuahkhirh duhna rilru leh ngaituahnaah a awm a, ran khuahkhirh hi sawi aia thil har a ni a, mahse VC leh tlawmngai pawl te nen tan ho a hma kan lak chuan thil tih theih ngei a ni tiin thu hma a sawi a. Hemi hnu hian Kolasib veng hrang hranga VC ten hemi chungchanga hma an lo lak tawh dan leh an kalpui dante zau takin an sawi.

Meeting chuan ran khuahkhirhna chungchang atam thei ang ber inzirtirna chu vengchhung YMA chanchinbu kaltlanga chhuah thin nise tih te, hetiang awareness chungchang hi programme dangah te pawh sawichhuah leh tarlan thin nise tih te, kawng a awm chuan local TV ah he hemi chungchang hi sawiho theih nise tih te, Kolasib chhunga VC tin ten ui thi awrh tur, a number pekin siam nise tih te leh ran khuahkhirhna kalpui anih dan en ho turin Police leh Magistrate ten a khat tawkin khawpui fangkual se tih te an rel a. Ran, abik takin ui VC ten an mana a tlanchhuahna zat tur bituk dante, an kawl hun chhung chungchang leh a tihral dan chungchangte pawh sawihoin hemi chungchangah hian ruahmanna an siam nghal a ni.

Puakthei ang chi halpuah leh halmawi chungchanga District Magistrate in khapna thupek a chhuah chu khauh taka kenkawh nise tih meeting-ah hian rel a ni a. Hemi chungchangah pawh hian awareness a tam thei ang ber vengchhung YMA chanchinchu, Kohhran hrang hrang, chanchinbu leh local TV kaltlanga siam nise tih te leh Police leh Magistrate ten sumdawng ten puakthei ang chi thil an zawrh leh zawrh loh thlithlai in checking te nei thin se tih te an rel bawk a ni.

Meeting chuan ran khuahkhirhna leh Krismas leh Kumthar vuak veta puak thei chungchanga Khapna thupek chhuah zawm tha Veng te thlanchhuah nise tih a rel a, hemi thil pahnih endiktu Committee atan MJA Kolasib District, Sub-Hqrs YMA Kolasib leh MHIP Sub-Hqrs leh MUP Sub-Hqrs te chu ruat nise tih rel a ni bawk.