3772/2022-2023

Kolasib dated 7th March 2023: Vawiin khan Pu John LT Sanga, Deputy Commissioner, Kolasib hoin Rengtetlanga bawlhhlawh paihna hmun leh Solid Waste Management Centre, Dihmunzawl endikna kalpui a ni a. Pu C.Lalzarliana, Sr. EE, Power & Electricity Department, Pu Vanlalchhunawma Chawngthu, SDO (S), Pi Rebecca Laldinmawii Hrahsel, DUDO, Pi PC Lalmuanpuii, Environment Engineer, Pollution Control Board, Pu Goerge Lalhruaia, SDO, PHE leh thawktu dangte he hun ah hian an tel a ni.

Pu John LT Sanga, Deputy Commissioner chuan Rengtetlanga bawlhhlawh paih thinna hmun chu National Green Tribunal thuchhuah bawhzuinain Mizoram sawrkar chuan ram leilung leh a chhunga cheng nungcha leh mihringte hrisel zawkna atan hmang chhunzawm lo tur a tih a nih thu a sawi a. Chu thupek chu a tak a kalpui a nih theih nan leh bawlhhlawh sawngbawlna hmun, Solid Waste Management Centre, Dihmuntlang chu tangkai zawk a hman a nih theih nan sawrkar department hrang hrangte nen ruahmanna siam tur a endikna neih a nih thu a sawi.

Pi PC Lalmuanpuii, Environment Engineer chuan Rengtetlang bawlhhlawh paihna hmun chu hmunhma rem lo leh ko sang tak a nih avangin NGT duh dan a hmang chhunzawm lo tur leh bawlhhlawh awmsa thiarchhuak tur a hma la tur chuan NGT in a phal anga Central Public Health & Environmental Engineering Organisation (CPHEEO) Ministry of Housing and Urban Affairs, Government of India leh Central Pollution Control Board-te rawn hmasak a that thu a sawi a.

Pi Rebecca Laldinmawii Hrahsel, DUDO chuan Rengtetlanga bawlhhlawh paihna hmun hman chhunzawm loh a nih theih nan Solid Waste Management Centre, Dihmuntlang chu changtlung zawk a thawmthat a tul tur thu leh sawt zawk a bawlhhlawh sawngbawl hna kalpui a nih theih nan in tin atanga bawlhhlawh thliar ngaih pawimawh a tul thu a sawi.

Vawiin Rengtetlang bawlhhlawh paihna hmun endikna leh Solid Waste Management Centre, Dihmuntlang endikna ah hian beisei anga Vermi-Composting hna kalpui theih a nih loh chhan te, Forest Clearance la hmuh loh vang a Land Fill hman tan a nih loh thu leh phai lam atanga bawlhhlawh tawih thei lo sawngbawlte leitu tur mumal an awm loh thu te sawi ho a ni.