Kolasib DC atanga chhuak tur Pi Niharika Rai, IAS chu vawiin khan Pi Lallianpuii, Dy. Director, I&PR leh Kolasib tualchhung chanchinthar thehdarhtuten a Office chamber-ah thlahna hun an hmang a. Inkawmhona hun tha tak hmangin Pi Rai chuan thawh hona tha tak an neih avang leh kawng tinrenga Media ten an tawiawm thin avangin lawmthu a sawi a, Mizoram sawrkar chu DC a nih chhung zawnga a chunga rinna a nghah vang -a a lawmzia sawiin Mizoram chu hmun nuam, a tana In nuam tak a nih thu a sawi a ni.

Pi Lallianpuii, Dy. Director chuan Pi Niharika Rai, IAS kaihhruaina hnuaiah Kolasib District chhungah hmasawnna tamtak awmin Deptt. hrang hrang thawhhona pawh a tha hle a a hriat thu a sawi a. A hunlai hian ama hmalakna liau liau-in tunhmaa anla tawn ngailoh thenawm vairam nena inunauna boruak tha a awm theih nan Kolasib leh Silchar DC Football team ten Friendly match an khel a.. Town Road siam pawh thahnemngai taka aman hma a lak avangin hna a chak phak a ni, a ti a. Ramri chungchanga thenawm state te nena inbiakna neih tuma a tan nat theihzia te a ropui a. Amah hi Media te ngai pawimawh tak, thurawn ngaichang thiam leh englai pawha biak pawh theih mi a ni, a ti a . Delhi a a thawhnaah pawh Mizoram tana tangkaina a neih hunte a awm a nih chuan theihtawp lo chhuah thin turin a chah a ni.

Pu H. Vanlalnghaka, Secretary, MJA, Kolasib chuan Pi Raii kaihhruaina hnuaiah Media ten ngaih pawimawh an hlawh avanga lawmthu a sawi a. A hunlai hian Department tinte inkarah pawh thawhhona tha tak a awm a ni, a ti a ni.