Vawiin khan Aizawl Bawrhsap thar, Dr.Franklin Laltinkhuma hovin mi pawimawhho an thukhawm a. April 10-13, 2012 chhunga Army lak runpuia hmalak dan tur an thlir ho. Aizawl Recruiting Office hotu berin thahnem a ngaih avangin tun tumah hian 150 vel lak theih a ni dawn a, sipai tang duhte lo inring turin a chah nghe nghe a ni. Recruiting Officer chuan Class VIII passed si, ‘what is your name’ tih pawh chhang thei lo an awm thin thu sawiin, Mizote harsatna ber chu tawng chungchangah a ni a, Pawl VIII pass te chuan Hindi a an thiam loh pawhin saptawnga biak tlem tal chhang thei turin inbuatsaih se, tih thu a sawi nghe nghe a ni.
He Army Recruitment Rally-ah hian Chief Minister leh Governor te pawhin a hmunah an enpui ve dawn nia hriat a ni. Mizo Thalaiten he Seat 150 awm hi kan chan vek theih nan tan lak a ngai hle a ni.
Sawi tawh angin Army General Duty atan Pawl 8 Certificate an neihte DEO countersigned tir ngei tur a ni a; Clerk leh Store Keeper atan Pawl 12 pass, Technical atan pawl 12-a PCM pass leh Nursing Assistant atan Pawl 12-a PCB pass te luh theih a ni. Graduate tan pawh dil chi tak a ni. Mi fel leh Discipline tha te chu an service hnuin Commission Officer-a luh theihna chance tha tak a awm thin a ni.
