4537/2024-2025

Siaha the 5th March 2025: Vawiin chawhma dar 11 khan Siaha District Consultative Committee (DCC), District Level Review Committee (DLRC) for Quarter ended December 2024 leh Special DCC Meeting for 2024-25 chu Pu VL Hruaizela Khiangte, Deputy Commissioner, kaihhruaiin DC Conference Hall-ah an ṭhukhawm.

District Bawrhsap Pu VL Hruaizela Khiangte chuan Bank hotute chu quarter tina neih thin DCC/DLCC meeting chu ngai pawimawh turin leh zawhna eng pawh awm se chhang thei tura inpuahchah thin turin a hrilh. Bank-te chu a mamawhtu mipuite tan zau taka inhawng fo turin leh pawisa kawltu chauh nilova, mipui ten an mamawh hun taka an hman theih tura luangchhuak thin turin a chah a, a bikin PMEGP ah Siaha a hniam fal hle chu tan lak nasat a ngai lehzual a, kut themthiamnaa eizawng ten eizawnna nghet an neih ve theih nan department leh bank-te tang lehzual turin a chah bawk.

Vawiin meeting-ah hian Kum 2024 chhunga bank hrang hrangte hnathawh thlirlet niin, hmachhawp an neih leh hmalak zui dan tur te sawiho nghal a ni a, Financial Literally Campaign (FLC) chu chak taka kalpui a tul hle an ti a, mipuiten an hamthatna tura sawrkar in a ruahmante hrilhhriatna, FLC chu thlatin vawi 2 tal neih thin tur a nih thu leh zirna in school/college-ah vawikhat tal buatsaih thin tur a nih thu tarlan nibawkin bank-te chu he thu hi zawm theuh tura hriattir an ni. FLC chu hlawhtling taka kalpui a nih theih nan Sawrkar line department-te nen thawhhona tha neih a tul hle a, Gram Sabha-ah te, department hrang hrang hnuaia farmers meet ah te, NRLM/NULM hnuaia SHG inhmuhkhawmna leh a dangahte neih thin nise hmasawnna a chak zawk dawn thu te sawi a ni.

Sawrkar laipui hnuaia Social Security Scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Pradhan Mantri Jan Dhan Yoyana (PMJDY), Atal Pension Yojana (APY) bakah hmeichhe naupang puala ruahhman Sukanya Samridhi Yojana (SSY) leh Zirna (Education loan) dilna Vidya Lakhsmi portal-te chu mipui hriata puanzar a pawimawh thu tarlan a nibawk. Bank-a mipuiin sum an dahluh (deposit) zat za zela bank-in mipuia sum an puktir (credit) zat chhutna, (CDR) ah FY 2024-2025 chhungin Siaha District a bank te chu  97.27% a ni a, Mizoram pum angin Lawngtlai (106.9%) dawta pahnihna a ni thei chu a lawmawm hle an ti.  

He hunah hian Bank leh mipui sum vawn himna (security) lam te rel tel niin bank tinin security guard bakah CCTV an hung ta chu a lawmawm hle tih a ni a, amaherawhchu Siaha khawpui a lo him zawk nan CSR hnuaiah CCTV 2 theuh dah belh theih nise tih rawtna lut chu ngun taka ngaihtuah niin tih hlawhtlin ngei tum a nih thu tarlan a ni bawk a ni. 

Vawiin thutkhawmah hian Pu VL Hruaizela Khiangte chuan kum tina NABARD in an buatsaih thin lehkhabu 'Potential Linked Credit Plan 2025 - 2026' a  tlangzarh nghal a ni. Lead Bank Office-a Lead District Manager, Pu JM Soren leh Reserve Bank of India (RBI) aiawh bakah, bank hrang hrang leh line department aiawhte an tel a ni.